John 19 (TOMA)
1 Pilate zɛba é devei ve ga ti Yesu loɠa ga kpakɔi. 2 Salaʋusuiti ti ɠaingi vɛlɛni ga masa bɔɔlɔgi, ti dɔ unma, ti seɠe ɓɔi golai ta loo kɔba. 3 Názu ɠa ti ɠɛni maaɓuɠazu la ba, ti ɗa ɠɛ ma: «Ɗa ná, ee, Zuifuiti ta-masagi!» Ti ɠɛni goizuloɠazu. 4 Pilate ɠaleni ma ʋolu etea ʋelei, é ɠɛ Zuifuiti ma: «À wɛlɛ, nà ga ʋaa la eteaʋɛ, kɛlɛ à kwɛɛ ga gè la sɔ nɔpɛ kaazu zunui nii ʋa, nii nu a peelala su.» 5 Yesu ɠulani eteaʋɛ, ɠain bɔɔlɔgi unma, seɠe ɓɔi golai kɔba. Pilate ɠɛni ti ma: «Wɛlɛ zunui ʋa!» 6 Kɛlɛ tɛi zalaɠa ɠula ɠundiɠiiti ta ta-zalaʋusuiti ti Yesu ɠaani nɔ feya, ti tɔɔzeini ga ɓainga, ti ɗa ɠɛ ma: «Kpadɔ saa wului ma! Kpadɔ saa wului ma!» Pilate ɠɛni ti ma: «À seɠe, wa ɓɔɠɔi wo kpadɔ saa wului ma, kɛlɛ nɔ̀un gè la peelalazu ɠaazu ba.» 7 Zuifuiti ti ɠɛni ma: «Tɔ ka gi ya, tɔgi naa maaʋele ma, kɛni é za, tɔɔzei é ɓɔɠɔ ɠɛɛʋɛ ga GALA Doun Zunui.» 8 Pilate naama wooiti mɛnigai ma, ta ɓɔni ná-dualuagi ʋa. 9 É lɛɛni ʋolu ná-koizuʋɛ, é Yesu ɠaazaɠa, é ɠɛ ma: «Mini ɠa è zeɠezu ná?» Kɛlɛ Yesu la ɠɛni gooɠaaʋoteni. 10 Pilate ɗa ɠɛ ma: «Toɠa ɠale? Nà ɠa è la kɛɛzu è ʋa ɓɔɛ pɔ̀? È la suɠwɛɛ ɓaa ga zobogi ɠa bɛ̀, gè è ʋilɛ, ta zobogi ɠa bɛ̀ ga gè è ɓadɔ saa wului ma?» 11 Yesu gooɠaaʋoteni, é ɠɛ ma: «Ɗa-zobo nɔpɛ ge la mà, é ɠula naa ʋolu nii GALA ge feai è ya, é zeɠe geezuʋɛ. Tɔ ɠa é ba, zɔi é fèai è ya, naama nui unma ɠotoi wola wɔɔlɔʋɛ.» 12 É lɔɔzei naama ziɛgi zu ma niina, Pilate ɠɛni Yesu ʋilɛ keleɠele gaiziɛzu. Kɛlɛ Zuifuiti ti ɠɛni ɓainsu nɔ, ti ɗa ɠɛ ma: «Ɗa zunui nii ʋilɛna, è la ga Sezaal bɔɔla mu. Zɔi nɔpɛ é ɓɔɠɔ ɠɛɛzu ga masagi, naa ɠa ga Sezaal zili nu.» 13 Pilate naama wooi mɛnigai ma, é Yesu ɠulani eteaʋɛ, é zei tukpɔɠaaleʋezuʋɛ, ʋɛ ná laasei pɛai ga «Kotuɓazai Zu», ti ɠɛɛzu ná ma Eɓulu wooi zu: «Gaɓata». 14 Pakegi maaɲii voloi ɠɛni de, folo gaalɔgai ma ziɛgi zu. Pilate ɠɛni Zuifuiti ma: «Wa-masagi ɠa!» 15 Kɛlɛ ti ɠɛni ɓainsu, ti ɗa ɠɛ ma: «Paa! Paa! Kpadɔ saa wului ma!» Pilate ɠɛni ti ma: «Wa-masagi ʋe, wo ɠɛ gè naa ɓadɔ saa wului ma?» Zalaɠa ɠula ɠundiɠiiti ti ɠɛni ma: «Masa kili ge la gi ʋɛ, é ɠula Sezaal ʋolu.» 16 Názu ɠa Pilate dɔɔni la ti yeezu ga ti kpadɔ saa wului ma.Ti Yesu zoni naazu, ti lii la. 17 Ti ɠulani ga Yesu taai ʋa, tɔ ɓɔɠɔi zaa wului laani kɔma, ti lii la adɛ ta, ʋɛ ná laaseigi ga «Unkala Adaʋɛ», é wosu Eɓulu wooi zu ga «Gɔlegota». 18 Salaʋusuiti ti Yesu ɓadɔni miná saa wului ma. Ti ti ɓadɔni ʋɔɔma saa wuluiti ma ta zunu felegɔ, gilagi ɠɛ ʋepe ɠila, gilagi ɠɛ zɔɔla ʋelei, Yesu ɠɛ ti yɔɠɔzuʋɛ. 19 Pilate sɛʋɛi ɠɛɛni, ti kpakpa Yesu zaa wului ungaʋɛ, é zɛʋɛni su ga: «Nazalɛte nui Yesu, Zuifuiti ta-masagi». 20 Zuifui ma mɔinmɔin ge naama zɛʋɛi ɠalani, tɔɔzei ʋɛ ti Yesu ɓadɔni ná saa wului ma, ná ɠɛni taa loaʋɛ nɔ, tama ti sɛʋɛi ɠɛɛni Eɓulu wooi zu, ta Latɛn wooi, naa ʋɛɛ Gɛlɛke wooi ʋa. 21 Zuifuiti ta-zalaɠa ɠula ɠundiɠiiti ti ɠɛni Pilate ma: «Mina sɛʋɛ ga ‹Zuifuiti ta-masagi›, kɛlɛ sɛʋɛ ga ‹Zunui nii ɠɛɛʋɛ ma: Nà ga Zuifuiti ta-masagi›.» 22 Pilate ti wooɠaaʋoteni, é ɠɛ ma: «Nii gè sɛʋɛai, gè ɓega ga sɛʋɛ.» 23 Salaʋusuiti kpegai ma ga Yesu ɓadɔ saa wului ma, ti maaɠili zɔɔlaiti seɠeni, ti kɛ su naani, ɛsɛ ge gilagila sɔlɔɔ. Ti ná-seɠewuzeɠei ɓalaa seɠeni, nii daɠasu la ɠɛni ba, fɛlɛa ɠɛni de ga geze zii ɠilagi nɔ, é zo ungaʋɛ, é yei kɔɠɔaʋɛ. 24 Salaʋusuiti ti ɠɛni ɠɛɛzu ɓɔɠɔ ma: «Ade mina bali ga, kɛlɛ ade kɛ ga kpakutoomai, ade kwɛɛ nui nii é ʋaazu yɛsu zea.» Naa ɠɛɛni, nii a kɛ GALA Sɛʋɛi zu wooi ʋilɛ su, nii bogai ga:«Ti nà-seɠeiti gaaɠwɛa ɓɔɠɔ ʋa.Ti kpakutoomai ɠɛ ga màazeɠeiti.»Ʋele ɠana salaʋusuiti ti kɛɛni la. 25 Yesu zaa wului ɠobaʋɛ, Yesu dee ɠɛni loni ná, ta dee deɠe anzanui, ta Kolopase anzai Mali, naa ʋɛɛ Magedala nui Mali ʋa. 26 Yesu dee ʋɛtɛgai ma, ta é kaladopoi ɠa, nii é nɛɛni ʋɛ, naa koba, Yesu ɠɛni dee ma: «Anzanu, wɛlɛ, è-loin ɠaa,» 27 é ɠɛ kaladopoi ma: «Wɛlɛ, è-lee ɠaa.» É zo naama yeeɠɛɠalai ma niina, kaladopoi naa Yesu dee zeɠeni, é lii la ná-pɛlɛi wu. 28 Naa ʋoluma, tɛi Yesu ɠɛni kwɛɛni ga fai pɛ daazeelia, nii a kɛ GALA Sɛʋɛi zu wooi ʋilɛ su, é ɠɛni ma: «Kpɔɔle wɔin ɠa mà.» 29 Ziɛ liɠii ta ɠɛni ná ɠobaʋɛ, daavegai ga dɔɔ ɓodai. Ti seɠe ɓuɠai lɔ dɔɔ ɓodai wu, ti gili ɠizɔɔpegi ma ɓekegi ʋa, ti tete Yesu laaʋɛ. 30 Yesu dɔɔ ɓodai ɓɔleai ma, é ɠɛni ma: «Fai pɛ daazeelia.» Naa ʋoluma é unpilɛni, zii loo. 31 Tɛi dooɠo foloi maaɲii voloi ɠɛni de, tama niima looɠo foloi ɠɛni ga folo wola yɛ, Zuifuiti ta-ɠundiɠiiti ti la ɠɛni pɔ ga poomaiti ti ʋa yɛ saa wuluiti ma dooɠo foloi. Ti liini, ti Pilate maanɛɛnɛ ga ti naati ti-ɠɔɠɔiti suɠaleɠale, naa ʋoluma ta ti ɠula niina saa wuluiti ma. 32 Salaʋusuiti ti ʋaani, ti toosu nu mɔungi ɠɔɠɔiti suɠaleɠale, niiti ti ɓadɔni ʋɔɔma saa wuluiti ma ta Yesu, ti zɔi ɓalaa ɠɔɠɔiti suɠaleɠale. 33 Kɛlɛ siɛgi zu ti zeelini la Yesu ma, ti kaani ga é za, naa maaʋele ma ti la mɔ ɠɛni kɔɠɔiti suɠaleɠaleni. 34 Salaʋusui gila ge ná-kpɛɛin lɔɔni Yesu ɠokakamaʋɛ, gaamago ɲamai ta ziɛi ti ɠulani ná. 35 Zɔi é niima vaiti suɠulazu, é ti ɠaaʋɛ ga ɠaazu feya, ná-zeele wooi ɠa ga gaamai. É kwɛɛni ɠɛzɛɠɛzɛ ga gaamai ɠa é bosu, nii a kɛ wa ɓalaagi, wo la Yesu la. 36 Mazɔlɔɔ niima vaiti pɛ kɛɛʋɛ, nii a kɛ nii bogai GALA Sɛʋɛi zu, naama wooi ʋilɛ su ga: «Ma ɠaei tanɔpɛ ge la ɠalea.» 37 Naa ʋoluma bogɛ GALA Sɛʋɛi zu ná taɠili ga: «Ta ɠaazulo naama nui ʋa, nii ti bɔɔni.» 38 Naama vaiti teʋegai ma, Alimaté taazuʋɛ nui Zozɛfe liini, é Pilate maanɛɛnɛni ga naa va bu, é Yesu ma ʋoomai zeɠe. É ɠɛni ga Yesu ná-kaladopoi gila dɔɔɠuzu, tɔɔzei é ɠɛni luazu Zuifuiti ta-ɠundiɠiiti ba. Pilate vaani bu, Zozɛfe ma ge li, é Yesu ma ʋoomai zeɠe. 39 Nikodɛme ɓalaagi ʋaani, nii é ʋaani Yesu ʋɔ bɛ mɔunpa ga kpidii. É ʋaani ga miilegi ta alɔwɛgi ti zupuai ga ʋe, a la kilo ʋuusaʋagɔ (30) ɠɛɠala ɠula. 40 Ti felegɔ pɛ ti Yesu ma ʋoomai zeɠeni, ti maavelevele ga geze zeɠeiti, ta tufa maku nɛɛnɛgiti, ʋelei Zuifuiti ta ɗa maaɠulugi wo da. 41 Ʋɛ ti Yesu ɓadɔni ná saa wului ma, kpelei ta ɠɛni ná ɠobaʋɛ. Kpelei naa zu, kaba niinɛi ta ɠɛni ná, ʋɛ nu nɔpɛ ge la ɠɛni dɛ laani ná. 42 Tɛi Zuifuiti ta-looɠo foloi maaɲii ɓɔkɔi ɠɛni de, miná ɠa ti Yesu maaɠuluni ná, tɔɔzei kabai maa la ɠɛni ɠoozani ná ʋa.