Lamentations 4 (TOMA)

1 Leeni ʋe deɠɛmu! Zanugi ɠɔikɔiga!Zanu kitei la mɔ volozu!Kɔtu ɲadegaiti ti vazagataazuʋɛ peleiti su. 2 Leeni ʋe mu, Siyɔn lointi ti vizɔgai,ti-zuɲɛgi vizɔni zanugi ʋa,ta zoo ti ɠaalu ga pɔlɔ liɠii zɔngɔi nɔ,diɠi lo nui kpɛtɛai? 3 Anɛɛ koʋeiti ta ɗa ɲiimi lɔti-lointi da.Kɛlɛ nà-nuɓusɛiti kɛɛʋɛ eɠɛ maawɔinɠaalala loun deei,eɠɛ saa wɔnigi é teʋebai zu. 4 Kpɔɔle wɔin doun ɲɛgiti nɛgiti katagati-laaɠoozuʋɛti ba.Doungoiti ta daamianigi ɠaiziɛzu,nu la ná, é ʋa ɠɛ dɔ daalaa ɠila kpalaa veezu ti ya. 5 Niiti ti ɠɛni daamii nɛɛnɛ golai wosu,naati ta loozu ga fikɛʋalasui taazuʋɛ peleiti su.Niiti ti kulasui woni ani ʋagɔiti pɛ saama,naati ta kpoɠagiti suvelɛsu. 6 Nà-nuɓusɛiti ta-ɠakagiti suwɔɔlɔʋɛ golaé leʋe Sɔdɔme nuiti ta-vaaɠaazagiti ba,nii é ɓezeɠeleni gaazulooma laa ɠila daawu,nu la yeevɔɔɠuni ba. 7 Siyɔn ɠundiɠiiti ti ɲadeni, é leʋe kobe kolegi ʋa,ti-ɠɔlɔgi ɠole é leʋe nɔnɔi ʋa.Ti-ɓusɛi ʋa é leʋe kpɔzɔi ʋa.Ti-ɠaazuʋɛ ɗa volo é leʋe kɔtu zɔngɔ ɓaagi ʋa daa ga safiilegi. 8 Ti maaʋɛ lɛiɗa é leʋe kpakpaliɠii ʋa,nu la mɔ ɠwɛɛsu ɠaazu ti ʋa taazuʋɛ.Ti-ɠɔlɔgi ɠataga ti-ɠaeiti ba,ti-ɠɔlɔgi vɔa ti ma eɠɛ gulu vɔɔi. 9 Niiti ti zaazu ga boɠa zɔkpɔi, naati undaanɛɛʋɛé leʋe naati ba, niiti ti zaazu ga pului,ti vɔɔzu, ti ɠaɲa,mazɔlɔɔ ti ʋalagɛ kpala ga aniiti ma. 10 Doun deeiti ti ga maawɔinɠaa nuiti,ti ɗa ti-lointi gili diɠii zu,ti ɠɛ ti ʋɛ ga daamianigikidaaʋiligi zu é zeelini nà-nuɓusɛiti ma. 11 Ɠɔoɠɔ GALAGI zeelia ná-ziiɠaawanai ɠwɛ ma,é ná-ziiɠaawana wolai laaɓadɔa,é abui ɠaazoni Siyɔn,naa ma wuulaagiti pɛ galani. 12 Eteai zu masagiti ta nu nɔpɛge la ɓena zoo é ʋa la da,ga yeeta, pilɛ sɔlɔɔ nui, nii é ga gi zili nuia la lɛ Zeluzalɛme ga pɛlɛla ʋeleiti. 13 Naa ɠɛɛʋɛ ná-GALA goo wo nuiti ta-ɠotoi ma vaa zu,ta ná-zalaɠa ɠula nuiti ta-vaaɠaaza golaiti,niiti ti telebo nuitima ɲamai ʋuuni náʋɛ. 14 Kɛlɛ niizu ta leʋesu taazuʋɛeɠɛ gaazuɠole nua,ti ɠɔzɔai ga ɲamaieyɛsu nu la zooga é ʋa vɔɔɠu ta-zeɠei ʋa. 15 Ta ɓainsu ti ma ga: «À lɔu li, kɔzɔba nuiti!À lɔu li, à lɔu li, à mina vɔɔɠu gi ʋa!»Siɛgi zu ti ʋelazu la ɠana, ti ɗa leʋeteʋe ziiti saama,ta ɠɛɛzu ti ma: «À mina zei ʋɛ!» 16 Ɠɔoɠɔ GALAGI ɓɔɠɔi ɠa é ti zuvazani,é la pɔ é ʋa ti ɠaa mɔnɔ.Ti la ɠɛni unfema veeni zalaɠa ɠula nuiti bɛ,ɓaa ti ʋa kɛwola wɔlɔiti bɛlɛzei. 17 Gi-ɠaazuʋɛ yɛni nɔ ɓɔlɔzu dɛ,gi ɗa kpɔbai maaɓɔun fuun.Gi ɠɛni gá-ɠɔɔɓɔgi zeizuʋɛ, gi ɗa wɛlɛ zii ta luɠɔ,é la ʋaani é ʋa gi ɠizo. 18 Gi zili nuiti ti ɠɛni gi-ɠɔɠɔ ʋo gaiziɛzu,gi la mɔ ɠɛni ziɛziɛsu taazuʋɛ.Gá-eteai ɠana ɓe, gá-voloiti daazeelia,gi-ɠaaɓelagi zeelia. 19 Gi ɓɛɛ nuiti gola zuvilɛni,é leʋe koɠɛi ʋa geezuʋɛ.Ti ɠɛni gi ɓɛɛzu gizeiti ma,ti ɠɛni seikpɛgi ʋɛɛzu gi ɠaiziɛ vai zu teʋebaiti su. 20 Gá-masagi, nii Ɠɔoɠɔ GALAGI gulɔi ziɛni ma, nii gá-eteai ɠɛni zea,ti naa zoni ga ta-ʋaliiti,tama naa ɠa gi ɠɛni ɠɛɛzu ma:«Gá yɛ ná-niinigi wu, gi gá-eteai ziɛ zii ɠiligiti saama.» 21 Wa zoo wo ɠoozunɛ, Edɔme nuɓusɛiti,wɔiti wo zeini Use yooi zu!Kɛlɛ tukpɔɠaaleʋe ɗaawɔi ɠa zeelizu ɓalaa wo ma,ma lɔɔi ɠa wo zo, wo maaɲakai ɠula! 22 Siyɔn nuɓusɛiti, wo-zalai laazeelia,nu la mɔ lia ga ɗe duɔla zu pɛ.Kɛlɛ ɗɔun ɗa, Edɔme, Maliɠii ɠa ɗa-vaaɠaaza golaiti salazu,toɠa ɗa-ɠotoiti kula kɛlɛma.

Lamentations 4 (TOMA)

In Other Versions