Mark 8 (TOMA)
1 Naama voloiti su, bɛbɛ wola ɠaalɛɛni ba mɔnɔ Yesu ɠoba, daamiani ge la ɠɛni ti ya. Yesu zɛba é ná-kaladopoiti toli, é ɠɛ ti ma: 2 «Bɛbɛi nii maawɔin sòga, mazɔlɔɔ folo saʋagɔ ɠa ti kòba, daamiani nɔpɛ ge la ti ya. 3 Nà pului yɛna ti ma, gè ti ɠaaɠale ma ta-ɠoizuʋɛti, zɛbɛi ɠa ɠula ti ya pelei zu, tɔɔzei tanigaa zeɠezu ɠoozaʋɛ.» 4 Ná-kaladopoiti ti ɠɛni ma: «Mini ɠa nu a ɓulu zɔlɔɔ ná, é kula ɠɛ niiti pɛ ba, teʋebai nii zu?» 5 É ti ɠaazaɠani, é ɠɛ ti ma: «Ɓulu lielegɔ ɠa é wo ya?» Ti ɠɛ ma: «Ɓulu lɔfela.» 6 É zɛba é bɛbɛi leve ga ti zei zooi ma. Naa ʋoluma, é ɓulu lɔfelaiti seɠeni. Kpegai ma ga mamagi ve GALA bɛ, é ti ɠaleɠaleni, é ti ve ná-kaladopoiti zea ga ti gaaɠwɛ bɛbɛi ʋa. Naati ti gaaɠwɛɛni bɛbɛi ʋa. 7 Kalei tago ɓalaa ge ɠɛni ná. Yesu mama fee ƓALA falii woni ɓalaa ma, é ɠɛ ná-kaladopoiti ma, ti gaaɠwɛ. 8 Ti pɛ ti daamii woni, ti yiɠo. Kaladopoiti ti ma ɓulukpulugi mɔtai ɠaalɛɛni ba, é ɠɛ ga kpɔlɔ dɔfela. 9 Nu waanaanigɔ (4.000) ɠɛɠala ɠa é ɠɛni ná. Naa ʋoluma Yesu ti ɠaaɠaleni ma. 10 Gaamago ti lɛɛni keingi zu ta ná-kaladopoiti, ti li Dalamanuta yooi zu. 11 Faliziɛinti ti ʋaani, ti maaɠaali laalɛ bu. Ti gaazaɠani ga é laavɔɔ vai ta ɠula kɛlɛma, é ɠulazu geeɠɔlɔgi zu. Ti ɠɛni pɔ ti suɠɔɠɔ. 12 Yesu yɛnvu maaɠulani fɛɛ, é ɠɛ ti ma: «Lee vaa zu niizuʋɛ nuɓusɛiti ti laavɔɔ vaa maaɠaazaɠabosu? Gè bo wo ma ga gaamai, poo nɔpɛ ge la vea ti ya.» 13 É ti yɛni ná, é lɛ keingi zu ʋolu, é li ga ziɛ ʋoluʋelei. 14 Kaladopoiti ti yeemani, ti la ɓulua zeɠeni, gila kpe nɔ ɠa é ɠɛni ti ya keingi zu. 15 Yesu zɛba é devei ve ti ya, é ɠɛ ma: «À ɓɔɠɔ zo, wo dama ga Faliziɛinti ta-lɛʋɛi ta Elɔde nɔnɔi.» 16 Kaladopoiti ti zɛba ti ɗa ɠɛ ɓɔɠɔ ma: «Tɛi ade la ɓulu zeɠeni, naa ɠa é nuuma wooi wosu da.» 17 Tɛi Yesu ti ɠisu vai ɠwɛɛni, é ɠɛni ti ma: «Lee vaa zu wo kpɔɛi zuɠulazu ga tɛi wo la ɓulu zeɠeni? Wo la dɛ ɠidaazu faiti bu, wo ʋa ti ɠaaɠa ɓaa? Wo ɠikpaaʋɛ mu? 18 Wo-ɠaazuʋɛti ti la wozaɠaazu? Wo-woiyeɠeiti ti la faa mɛnisu? Wo-ɠi ge la looni ná zu: 19 Siɛgi zu gè ɓulu lɔɔlugɔi ɠaaɠwɛɛni la zunu waadɔɔlugɔi (5.000) ʋa, mɔtai é yɛni, wo gaalɛ ba, é ɠɛni ga kpɔlɔ dielegɔ?» Ti ɠɛ ma: «Puugɔ maazu felegɔ (12).» 20 Yesu ɠɛni ma: «Naa ʋoluma gè ɓulu lɔfelai ɠaaɠwɛai ma zunu waanaanigɔi (4.000) ʋa, mɔtai é yɛni, wo gaalɛ ba, é ɠɛni ga kpɔlɔ dielegɔ?» Ti ɠɛ ma: «Dɔfela.» 21 É zɛba é ɠɛ ti ma mɔnɔ: «Wo la dɛ gaaɠaani?» 22 Ti zeelini Ɓɛtesayida. Nuiti ti ʋaani ga gaazuɠole nui ta Yesu ʋɔ miná, ti maanɛɛnɛ ga é yeevɔɔɠu ba. 23 Yesu gaazuɠole nui zoni zeei ʋa, é ɠula la taai ʋa. Naa ʋoluma é laaɗɛi ziɛni naa ɠaazuʋɛ, é yeela ma, é gaazaɠa ga: «Ɗa zoosu è ani ɠa?» 24 Gaazuɠole nui gooɠaaʋoteni, é ɠɛ ma: «Nà nuiti kaazu, eɠɛ guluiti ti ɗa ziɛ.» 25 Yesu yeevɔɔɠuni ʋolu gaazuɠɛzɛiti ba. Gaamago nɔ gaazuɠole nui ɠaazuʋɛ zeɠeni ma, é ɗa wozaɠa ga pagɔ. 26 Yesu ɓeni ba é li ná-koizu, kɛlɛ é ɠɛni ma: «Mina vɔlɔ lɛ taazuʋɛ.» 27 Yesu ta ná-kaladopoiti ti liini taa goiti su, niiti ti Sezalé Filipe maaɠoolii zu. Ti ɠɛai ma pelei zu, é ná-kaladopoiti gaazaɠani, é ɠɛ ti ma: «Nuiti ta ɠɛɛzu nà ga ɓɛ?» 28 Ti gooɠaaʋoteni, ti ɠɛ ma: «Tanigaa ti ɠɛ, ɗa ga Zan Ɓatisete, zɔiti ti ɠɛ Eli, taɠiligaa ti ɠɛ mɔnɔ, ɗa ga GALA goo wo nui ta.» 29 É zɛba é ti ɠaazaɠa, é ɠɛ ti ma: «Wɔun, wa ma, wo ɠɛ nà ga ɓɛ?» Piyɛlɛ gooɠaaʋoteni, é ɠɛ ma: «Ɗa ɠa è ga Mesi.» 30 É ti laa maaɓakpani ga ti mina naa wo nu nɔpɛ ma. 31 É tɔɔzeini ga é ɗa ti ɠala ga, kɛni Nu ná-Doun Zunui kpɔlɔ mɔinmɔin sɔlɔɔ, totuɠɔiti ti ɠɛlɛ ba ta zalaɠa ɠula ɠundiɠiiti, naa ʋɛɛ tɔ kalamɔinti ba. Kɛni ti paa, naa ʋolu é wuzeɠe, é ɠula saai ya folo saʋagɔ ʋoluma. 32 É naati boni ti ma, su ɠɛ kala. Piyɛlɛ zɛba é seɠe, é lii la yɛ, é tɔɔzei ga é ɗa zelii lo ma. 33 Kɛlɛ Yesu latini, é wɛlɛ ná-kaladopoiti ba, é zelii lo Piyɛlɛ ma, é ɠɛ ma: «Maaɠooza bà, Setana! Mazɔlɔɔ ɗa-ɠisiɛiti ti la ga GALA nɔnɔ, kɛlɛ ta ga nuɓusɛ ɠisiɛiti.» 34 Naa ʋoluma Yesu bɛbɛi lolini, naa ʋɛɛ ná-kaladopoiti ba, é ɠɛ ti ma: «Zɔi é pɔ ga é ʋilɛ pòlu, kɛni é ɠikula ɓɔɠɔ zu, é zaa wului zeɠe, é ʋilɛ pòlu. 35 Tɔɔzei zɔi é pɔ é zɛnvui ɠizo, naama nui ɠa ʋala ma. Kɛlɛ zɔi a ʋala zɛnvui ma nà-faa zu, ta Woo Niinɛ Ʋagɔi maaʋele ma, naama nui ɠa zɛnvui ɠizo. 36 Ni nui ta a etea zɔlɔɔ ganii pɛ sɔlɔɔna, kɛlɛ é ʋala zɛnvui ma, kulanuma ɓɛgele ɠa é bɛ? 37 Ɓɛgele ɓɔɠɔɓɔɠɔ ka nu a zoo feezu ga zɛnvui unmɔɔ ganii? 38 Mazɔlɔɔ zɔi a unfe ga ze ta dàawooiti, niizuʋɛ yamani nii zaama, niiti ti ga wooʋalada nuiti ta kotoba nuiti, Nu ná-Doun Zunui ɓalaa ka unfe ga naama nui, siɛgi zu ti ʋaazu la ta geezuɠeela ɲadegaiti, Kɛɛɠɛ ná-lɛbiyai zu.»