Ephesians 5 (GGMNT)
1 Hessa gish inte dosetiza nayta mala Xoosu millaatite. 2 Kirstossay nuna siqidaysa mala qasseka nu gish bena sawiiza yarsho mala Xoossas aathii imida mala inteka siiqon simiiretite. 3 Laymay woykko tunatethi woykko uzetethi mulekka inte gidon betoy attin zigirsikka siyetofo. Hesamala gesha Xoossa asas besena. 4 Inte galata galatizayta gidite attin asse yelachiza lafa hasa7ay co eyatetha yoy intes besontaa gish hessamalay inte garisan doppo. 5 Qasseka inte laymatizaytas woykko tuanatas woykko uzetizaytas Kiristossa kawotethanine Xoossa kawotethan istas latasoy bayndaysa inte eriite. Uzetethi eqqas goyno malakko. 6 Intena oonikka worido hasa7on balethofo. Gasoyka Xoossa hanqoy izas azazetonta nayta bolla yanay haytanta malana. 7 Hessa gish hessanta malara isipetopitte. 8 Kasse inte dhuuma shin Godan ha77i inte poo7o. Inte poo7o nayta mala diite. 9 Poo7os ayfey loo7otethan xiilotethanine tumatethan wurison des. 10 Hesathoka Goda ufaysiza miish koyite. 11 Ayfey baynda dhuma oothora intes ayko gagotethi dopo. Hessafe iita ootho qoncce kesite. 12 Dhuman diza asati geman oothiza misha gish hasa7aykka yelaches. 13 Po7oy po7iidazi wuri qonceen betes. 14 Gasoyka wursi besiizay poo7o. Hessa gish “Neno dhiskizayso beega, hayqope denda, Kiristosay nes po7isana” getetides. 15 Hesa gish eratethi bayndayta mala gidonta inte wanidi erata mala danakone nagetite. 16 Haysi wodezi iita gidida gish hessa lo7ethi eritte. 17 Hesa gish eyata gidopiite Goda sheney azakone yushi qopiite. 18 Ayanay kumidayta gidite atiin mathosiza ushan mathotofiite. Hessi meela miishe lallethikko. 19 Ayana yethan galatara gathi yexishe inte garsan isay isara hasa7etite. Inte sabaninne yethan kumetha wozinape Goda galatite. 20 Hesan Xoossa aawwa Goda Yesuss Kiristossa suntha wuriso mishas wuriso wode galatite. 21 Inte Kiristossas imiiza boncho yashara issay issas azazetite. 22 Macheeto inte Godas haretizamala inte azinatas haretite. 23 Kirstossay ba asho gidida wossa kethaysi hu7e gidida mala azinayka ba machcheysi hu7ekko. 24 Hesa gish wossa kethiiya Kirstosas azazetiza mala machchetika ba azinatas ay hanonka azazistanas beses. 25 Azinato, Kirstossay wossa keethayo siiqida malane bena izi gish athi imida mala inteka inte machcheta siiqite. 26 Be qaala bagara haathan meecci geshiidi bes dumasida mala. 27 Hesathoka qitay woykko ayfeso xiirphotethi woykko isi iitay izi bolla betonta geshiine balay izi bolla bayndaro boncho wossa keeth histidi bes shishanaskko. 28 Azinatika hessaththo ba machcho ba ashsho mala siiqanas beses. Be machcho siiqizadey bena siiqes. 29 Berika bena ixxiizadey oonikka ba. Be ashshos mesine bena nages. Kirstossayka wossa keethas hinithokka oothiides. 30 Nuni Kiristossa asatetha bollatakko. 31 Hessa gish “assi ayone aawa agidi ba machcheyra isino gidens, nam7aykka isi ashsho gidetes” Geteti gesha maxafan xafetides. 32 Haysi daro xuura yo, taka hayssa Kirstossa gishine wossa keeththa gish yotays. 33 Gidikkoka intefe isi issadey ba machcho bena siqqiza mala siqqo machchaka ba azina bonchu.