Ephesians 5 (MNT)
1 ዓካሪ ዒንሢ ፆኦሲ ዒ'ንሢ ናሽካያ፥ ዒዛኮ ናኣቶ'' ማዔሢሮ ዒዛ ማሉዋቴ። 2 ኪሪስቶሴ ኑና ናሽኬሢና ፆኦሲ ዎዛሳ ሳውሞ ዓኣ ዒንጎ ባኣዚ'' ማሂ ፔ ሼምፓሢ ኑ ጋይቴ ዓኣሢ ዒንጌሢጉዲ ዒንሢያ ናሹሞና ናንጉዋቴ። 3 ማቾ ሃሣ ዓኒ ማዒባኣያና ላሂሢ፥ ቦርሲሳ ማዾ፥ ዓሲሮ ዛጊ ሱኡካዺሢ ማዔቴያ ዒንሢ ባኣካ'' ጴዾፓ፤ ዬይ ጌኤሺ ማዔ፥ ፆኦዛሢ ዴሬም ኮይሳ ማዾቱዋሴ፤ 4 ዒንሢ ፆኦሲ ጋላታንዳኣፓዓቴም ቦርሲሳ ባኣዚ''ና ፓሣ ባኣዚ''ባኣ ጊኢጉዋ ሃይሴ ጌስታንዳያ ኮይሱዋሴ። 5 ማቾ ሃሣ ዓኒ ማዒባኣያና ላሃያኮ፥ ቦርሲሳ ማዾ ማዻያኮ፥ ሜሌ'' ካኣሺ ካኣሽኪሢጉዲ ዓሲሮ ዛጊ ሱኡካዻ ዓሲኮ ኪሪስቶሴና ፆኦሲ ካኣቱሞናይዳ ቤሲባኣያ ማዓንዳሢ ዔሩዋቴ። 6 ዬንሢ ባኮንሢ ዛሎ''ና ፆኦሲም ዓይሢንቱዋ ዓሶ ዑፃ ዒዛኮ ጎሪ''ንቲ ሙካንዳሢሮ ዖኦኒያ ዒንሢ ጉሪ ማዔ ሃይሴና ጌሾፓ። 7 ዬያሮ ዬንሢ፥ ዒዛም ዓይሢንቱዋ ዓሶና ዎላ'' ፔቴ'' ማዒፖቴ። 8 ቤርታ ዒንሢ ዹሚዳ ናንጋኔ፤ ሃሢ ጋዓንቴ ጎዳና ፖዓ ዒንሢ ዓኣሢሮ ፖዖ ዓሳ ናንጋ ጎይፆ ናንጉዋቴ። 9 ዓይጎሮ ጌዔቴ ኮሹሞ ቢያ፤ ፂሉ''ሞንታ ጎኑሞንታኮዋ ዓኣፒ ጴዻሢ ፖዒዳፓኬ። 10 ዬያሮ ጎዳ ዎዛሳያ ማዓ ባካ ዓይጎታቴያ ዱማሲ ዔሩዋቴ። 11 ዓኣፒባኣ ዹሞ ማዾ'' ዒንሢያ ማዻያ ማዒፖቴ፤ ፖዓ ኬሲ'' ፔጋሲ ዻውዋቴ። 12 ዹሞ ማዾ'' ማዻ ዓሳ ዓኣቺ ማዻ ባኮ ዛሎ'' ኬኤዛኒታዖ ቦርሳያኬ። 13 ቢያ ባኣዚ'' ፖዒዳ ኬስካዛ ዬይ ዓይጎ ማዔቴያ ጌኤሽኪ ዔርታኔ። 14 ዎይቲ ጌዔቴ ቢያ ባኣዚ'' ፔጋሲ ዻዋሢ ፖዒታሢሮኬ፤ ዬያሮ፦«ኔኤኒ ሃይ ጊንዓሦ ጴጬ! ሓይባ''ፓ ዔቄ!ኪሪስቶሴ ኔኤም ፖዓንዳኔ» ጌይንቴኔ። 15 ዓካሪ ዒንሢ ዎማይዲ ናንጋንዳቴያ ኮሺ'' ማሉዋቴ፤ ዔራ ዓሲ ማዑዋቴ፤ ዔኤያ ዓሲ ጎይሢ ናንጊፖቴ። 16 ሓይ ዎዳ'' ፑርታ ማዔሢሮ ዓይጎ ካራና ማዔቴያ ዒንሢ ዴንቄ ዎዶ''ማና ማዻ ባኮ ዔሪ ማዹዋቴ። 17 ዬያሮ ጎዳኮ ማሊፃ ዓይጎታቴያ ዔራያ ማዑዋቴ፤ ዔኤያ ማዒፖቴ። 18 ዒንሢ ባይሲንታ ባንሢ ዔኪ ዓኣዻያታሢሮ ዳጋሢ ዑሺና ማሢንቲፖቴ፤ ዬያይዳፓ ዓያና ጌኤሺ ቢታንቶ ዴሞ ጌላያ ማዑዋቴ። 19 ፆኦሲም ማዓ ዓይኑሞና ፆኦሲ ሄርሺ ሄርሺ ዒንሢ ዎላ'' ቡኬ ዎዶ''ና ዓይናዹዋቴ፤ ዬያይዲ ዒኔፓ ጎዳ ጋላቱዋቴ። 20 ኑ ጎዳሢ ዬሱስ ኪሪስቶሴ ሱንፆና ቢያ ባኣዚ''ሮ ፆኦሲ፥ ዓዳሢ ቢያ ዎዴ ጋላቱዋቴ። 21 ኪሪስቶሴ ቦንቾሮ ጌዒ ዒንሢ ፔቴ'' ፔቴ''ሢ ዎሊም ዓይሢንታያ ማዑዋቴ። 22 ዒንሢ፥ ላኣሎ ናኣታ! ጎዳ ዬሱሴም ዒንሢ ዓይሢንታሢጉዲ ዒንሢኮ ዓኒንሢም ዓይሢንቱዋቴ፤ 23 ዓይጎሮ ጌዔቴ ኪሪስቶሴ ሺኢጲፆ ማኣሮ ዓሶኮ ዑፃ ቶኦኪ ማዔሢጉዲ ዓኒያ ማቾኮ ቶኦኪኬ፤ ዬያጉዲ ኪሪስቶሴ ፔኤኮ ዑፆ ማዔ፥ ሺኢጲፆ ማኣሮ ዓሶ ዻቂሻሢኬ። 24 ሺኢጲፆ ማኣሮ ዓሳ ኪሪስቶሴም ዓይሢንታሢጉዲ ማቾንሢ ቢያ ባኣዚ''ና ፔ ዓኒንሢም ዓይሢንቶንጎ። 25 ዒንሢ፥ ዓቲንቃ! ኪሪስቶሴ ሺኢጲፆ ማኣሮ ዓሶ ናሽኬሢና ፔ ቶኦኮ''ዋ ዔያቶ ጋቴ ሃይቢም ዓኣሢ ዒንጌሢጉዲ ዒንሢያ ዒንሢ ላኣሎ ናሽኩዋቴ፤ 26 ኪሪስቶሴ ዬያ ማዼሢ' ሺኢጲፆ ማኣሮ ዓሳ ፆኦሲም ዱማዼያ ማዓንዳጉዲ ጌይኬ፤ ዒ ዔያቶ ፆኦሲም ዱማሴሢያ ቃኣሎ'' ዛሎ''ና ሓሣ ዋኣሢናኣ ማስኪ ጌኤሺ''ኬ። 27 ዬያይዲ፦ ኪንሢ፥ ዓኣፒ ካራ ቱኪ''ሢ፥ ፑርታ ባኣዚ''ያ ፔቴ''ታዖ ባኣያ፥ ጌኤሺ፤ ሃሣ ሚዛጲ ሺኢጲሢ ማኣሪ ዓሲ ማሂ ፔ ቤርቶ ዒንሢ ዒ ሺኢሻኒኬ። 28 ዓኒንሢ ፔና ናሽካሢጉዴያ ፔ ማቾንሢ ናሽካኒ ኮይሳኔ፤ ፔ ማቾ ናሽካሢ ፔና ናሽካኔ። 29 ዎይቲ ጌዔቴ ፔና ዒፃ ዓሲ ዖኦኒያ ባኣሴ፤ ጋዓንቴ ኪሪስቶሴ ሺኢጲፆ ማኣሮ ዓሶ ሙኡዚ'' ሙኡዚ'' ካፓ ጎይፆ ዒዚ ሙኡዚ'' ሙዒ ሙዒ ፔናኣ ካፓኔ። 30 ኑኡኒ ኪሪስቶሴ ዑፆኮ ዱማ ዱማ ቤዞኬ፤ 31 «ዓሲ ዬያሮ ዓዶና ዒንዶና ሃሺ'' ማቾና ዎላ'' ፔቴ'' ማዓኔ፤ ላምዖንሢያ ፔቴ'' ዓሲ ዑሢጉዲ ማዓኔ» ጌይንቴኔ። 32 ዬይ ዼኤፒ ዓኣሺንቴ ባኣዚ''ኬ፤ ሓያ ታ ጋዓሢ' ኪሪስቶሴና ሺኢጲፆ ማኣሮ ዓሶና ማላታ ማሂኬ። 33 ጋዓንቴ ሓይ ባካ ዒንሢማ ማዓያኬ፤ ዬያሮ ዓኒ ፔ ማቾ ፔናጉዲ ማሂ ናሽኮንጎ፤ ማቻኣ ዓኒ ቦንቾንጎ።