Ephesians 5 (KBV)

1 Kwaviya mweye ni wana wa Mulungu woyawalondile, molondeka mugeze kuwa fana yeye. 2 Ugima wenu wolondeka ulangulizigwe na ulondo, fana viya Chilisito viyachinogele cheye na kalava ugima wake kwa ichimu chetu fana mnung'ho unogile wa sadaka na zabihu ya kumtunhiza Mulungu. 3 Kwaviya mweye ni wanhu wa Mulungu, lelo ugoni na mbuli zihile zozose hebu ugila sekeuhulikike kumwenu. 4 Iviya mbuli za chinyala na za ubozi hebu ukewezi, yayo yose kumwenu hayafaya. Molondeka mumwing'he nhogolwa Mulungu. 5 Mumanye kuwa habule muashelati hebu munhu yotenda mbuli zihile na himu hebu munhu yambule mwiko, kalinga fana munhu yotambikila nyang'hiti, munhu fana iyo hezakwingila bule muna ufalume wa Chilisito na Mulungu. 6 Sekemtogole kuvwiziligwa na munhu kwa mbuli ubozi, kwaviya kwa mbuli fana izo nhaguso ya Mulungu yomwizila chila munhu yolema kumtegeleza. 7 Ivo sekemuilumbe na wanhu fana wawo. 8 Kwaviya mweye umwaka mukala muulwiza, mbali vimuwile wanhu wa Mndewa, mwa muna dibung'hulo. Ivo molondeka kukala fana viya wanhu wa bung'hulo. 9 Kwaviya bung'hulo dogala unovu na kunogeza haulongozi ha Mulungu na ukweli. 10 Gezeni kumanya dilihi dodimnogeza Mndewa. 11 Sekemuwe mvava muna zisang'hano zihile, zili muna diziza, mbali zigubuleni. 12 Mbuli zozitendeka kwa sili ni chinyala hata kuzitambula. 13 Mbali mbuli ziya zozigubuligwa muna dibung'hulo, zowoneka bwilili, 14 kwaviya chila chinhu chilagusigwe chowoneka bwilili. Lekamana ilongigwa,“Lamuka weye ukukila,zilibuka kulawa kowadanganike,na Chilisito kezakubung'hulila.” 15 Ivo mulole ng'hani vomukala. Sekemukale fana wabozi, mbali mukale fana wanhu wabala. 16 Sang'hanileni vinogile chila nzila imwili nayo, kwaviya siku zino ni za wihi. 17 Ivo sekemuwe wabozi, mbali mumanye yaja Mndewa yoyomulondani mutende. 18 Muleke kukoligwa kwaviya kwizawatendeza mutende vinhu vihile bila ya kuvimanya yondayachilawilile hamwande, mbali mumemezigwe Muhe Yelile. 19 Longanyeni kwa mbuli za zabuli na nyila za chimuhe. Mwimbileni Mndewa nyila za nhogolwa muna imyoyo yenu. 20 Siku zose mwing'heni hewela Mulungu Tata kufosela zina da Mndewa wetu Yesu Chilisito, kwa chila chinhu. 21 Chila munhu yamtegeleze miyage kwa ichimu cha kudumba kumwili nawo kwa Chilisito. 22 Mweye wanaake wategelezeni walume zenu fana vimumtegeleza Mndewa. 23 Mulume kana utawala kwa mke wake, fana viya Chilisito viyeli mtawala wa wose wowomuhuwila, nayo Chilisito niiyo Mulopozi wawo, wawo niuwo lukuli lwake. 24 Ivo wanaake wawategeleze walume zawo muna zimbuli zose fana viya wahuwila vowomtegeleza Chilisito. 25 Mweye walume, wanogeleni wake zenu fana viya Chilisito viyawalondile wahuwila wose na kalava ugima wake kwa ichimu chawo. 26 Katenda ivo muladi kwa mbuli, yawalave wahuwila kwa Mulungu, viyakomeleze kudisunha kwa mazi, 27 muladi yaigalile mwenyewo wahuwila weli na ukulu, wahuwila welibule chinhu chihile hebu uvwizi hebu kuikonyakonya, mbali wawe welile na welibule ubananzi. 28 Ivo walume wolondeka kuwanogela wake zawo fana ng'huli zawo wenyewo. Munhu yomnogela mke wake koinogela mwenyewo. 29 Habule munhu yoyose yolwihila lukuli lwake, mbali kolulisa na kuluyawaza, niivo Chilisito nayo viyawatendele wahuwila wose, 30 kwaviya cheye wose cha wanhu wa lukuli lwake. 31 Fana viya Yamaandiko Yelile viyolonga, “Kwa ichimu chino mulume kezamuleka tati yake na mami yake, na kezailumba na mke wake, nawo waidi wezakuwa chinhu chimwe.” 32 Kuna sili iifisa muna Yamaandiko Yelile yano, niye nowona kuwa ni mbuli ya Chilisito na wahuwila wose. 33 Na mweye molondeka kutenda yano, chila mulume yamnogele mke wake fana viyoinogela mwenyewo, na chila mke yamtegeleze mulumake.

Ephesians 5 (KBV)

In Other Versions