Acts 20 (SBT1E)

1 Ruhu lumpa hah ahek suole Paul'n iempungei a koibûma, a mohôkna chongin a mâk ngeia. Hanchu a jôka Macedonia rama a se zoia. 2 Mingei mohôkna chong tamtak misîrin ha ram hah a sir suoa, Achaia ram a tung zoia. 3 Mahan than thum aom suole Syria ram tieng se rangin ânthoka; hannirese, Judangeiin an lei muruong chien ti a riet sikin Macedonia tieng kîr nôk rang a bôka. 4 Pyrrhus nâipasal Sopater Beroea mingei, Aristarchus le Secundus, Thessalonica mingei, Gaius, Derbe, mingei, Timothy ngei, Tichicus le Trophimus Asia rama mingei an se sa. 5 Ha ngei hah moton aninsa. Troasa min lei ngâka. 6 Keini chu cholboivâipôl ruolhoi chumin Philipi renga rukuongin kin jôka. Sûn rangnga suole Troasa an kôm kin tunga, mahan sûn sari kin châma. 7 Sûnrukni kholoiin vâipôl khoi rangin kin intûpa, Paul'n anangtûka se rang a bôk sikin jânchim tena thurchi a misîr jêta. 8 Kin intûpna khâltan chunginchuon han châti tamtak mochok ania. 9 Hanchu ruotharte inkhat a riming Eutychus, kotvênga ân sunga inngûi a lênsua Paul thurchi misîr hah asôt rai sikin a lei inphara; in chunginchuon inthumna renga a juong tâka. An juong rût tena chu a lei thi zoi. 10 Aniatachu Paul a chuma a juon kûna a poma, “Nin mulung minjîng no roi, a la ring ke,” a tia. 11 Hanchu, Paul hah in chunginchuona a kal nôka, vâipôl a khoia, an sâk zoia. Asôtzan khuovâr rak dôr nisa asuok tena a chongpui ngei suole chu a se zoia. 12 Ruotharte hah damin a in tieng an tuonga an phûk adâiriem zoi. 13 Keini chu rukuongin Assos khuo panin moton kin lênsa zoi, mahan Paul min chuong rang kin bôka, ama hah kea hong rang a bôk sikin hi anga rangin mi ril sai ani. 14 Assosa mi hong huoma, kin min chuonga Mitylene kin tung zoi. 15 Ha mun renga hah rukuong nanâkin kin se nôka, anangtûka Chios kin tunga hatûk chu Samos kin tunga, anangtûk nôka Miletus kin tung zoia. 16 Paul'n Asia rama om sôt a nuom loi sikin Ephesus chu sûnapal rang a bôk piel ani. Ani thei paia anîn chu Jerusalema Penticos ni mang rang a bôka, ânnot ani. 17 Miletus renga Paul'n Ephesusa mi a tîra, koiindang ulienngei ava min koi ngeia. 18 A kôm an tungin chu an kôm, “Asia ram ku lût masa ni renga nin kôma ko om kâra ko omlam hah nin rieta. 19 Judangeiin min muruong sika mitrithi tâk pumin le zora intak ku chunga hong tung ngei tuongin intem takin Pumapa sin ko tho ngâi. 20 Nin ta ranga inlâpna rang ite thup loiin lôko lâia le insûngngeia nangni ki ril ngâia, nangni ki minchu ngâi duo. 21 Judangei le Jentailngei khom Pathien tieng an sietnangei renga insîrin ei Pumapa Jisua Khrista an iem rang ani ti insiemna chong ke pêk ngeia. 22 Male atûn Ratha Inthieng chong jômin Jerusalema ke se rang ani, mahan ku chunga imo atung rang riet mu ung. 23 Khopuilien tina, intâng ina le bâiinkhamnân mi ngâk ti vai hi Ratha Inthiengin mi min rieta, ki riet ani. 24 Pathien moroina Thurchi Sa misîr rang sintum Pumapa Jisua Khrista mi pêk zoina rangin chu ki ringna khom hi itên be mu-ung. 25 “Masikin riet roi, nin rêngin Pathien Rêngram thurchi misîra kên vâkna ngâi ngei hin atûn renga chu mi mu khâi no tu nui, ti ki riet. 26 Mapêna an mang nin om duoi le khom kei chu ko jôk ani ti avien hin nangni ki min riet. 27 Pathien neinun khîn murdi anrêngin nin lâia misîr inrîng mu ung. 28 Masikin Pathien koiindang, a Nâipasal thina sika ama ta ranga a sin chunga belripungei chang ungla, nangni le belripâl Ratha Inthiengin nangni a min kolna ngei satna rang zong roi. 29 Ku nûk le chu melang ichi om ngei nin lâia hong lût an ta, belripâl hôih noni ngei ti ki riet. 30 Nin pâla mi senkhat khomin iempungei an tieng an tuong theina rangin milak an ril zora la tung atih. 31 Hanchu sûn, jân mitrithi tâkpumin kum thum piel mitin nangni ki minchu hah riettitin sing thei roi. 32 “Atûn hin Pathien donsuina le moroina chonga nangni ka bânga ama han nangni a sin minlien theia, Pathien'n a mingei ta ranga a khâm satvurna hah nangni a pêk thei. 33 Tute sumdâr khom, rângkachak khom, sil le bom khom ôi ngâi mu-ung. 34 Ku kutngei lehin keima le ka champuingei anâng murdi asuo ngâi ti nangni rengin nin rieta. 35 Lamtina sintho ranak songin le Pumapa Jisua'n, “Lâk nêkin pêk râisânna aom uol” a ti hah riettitin râtloingei ei san rang ani ti nangni ki min mu ngâi,” a tia. 36 Paul'n ha chong hah a ti suole chu, khûkinbilin an rêngin chubai a thopui ngeia. 37 He hoiin an mathân zoia, anrêngin an chapa Paul hah an kuoa an tuma. 38 A mêl an mu nôk khâi loi rang chong Paul'n a misîr pe ngei hah an rangâi sietna bitak ani. Masuole chu rukuong dênin an juong thak zoi.

Acts 20 (SBT1E)

In Other Versions