Acts 25 (TOMA)
1 Siɛgi zu Fɛsɛtuse folo saʋagɔi ɠɛni la zooi unda, é zeɠeni Sezalé, é lɛ Zeluzalɛme. 2 Zalaɠa ɠula ɠundiɠiiti ta Zuifuiti ta-nu wolaiti ti ʋaani pɔ, ti ɓaazaɠa ma ga Pɔle laalɔɠɔ. 3 Ti gola maanɛɛnɛni ga naa ɠɛ ga faaɓɔɠɔ wola ti ʋɛ, é Pɔle leʋe ti ma Zeluzalɛme. Ti yaavai zeini Pɔle luɠɔ ga ti paa pelei zu. 4 Fɛsɛtuse ti wooɠaaʋoteni ga Pɔle ɠa kasoi ɠa Sezalé, naa ʋoluma tɔ ɓɔɠɔi toɠa ɠalesu ma fala. 5 É ɠɛni ti ma: «Zɔiti ti ga nu ɓiigiti wo zaama, naati ti ʋilɛ pòlu, gi li, ni zunui nii faa ɠoloɠolo kɛɛʋɛ, ti maaɓaazaɠa la.» 6 Fɛsɛtuse folo lɔsaʋa ɓaa folo puugɔ nɔ ɠɛɛni ti ʋa Zeluzalɛme, é yei ʋolu Sezalé. Poluma voloi, é zeini tukpɔɠaaleʋezuʋɛ, é devei ve ga ti ʋa ga Pɔle. 7 Siɛgi zu naa ʋaani la, Zuifui niiti ti zeɠeni Zeluzalɛme ti yei Sezalé, naati ti ɠakuni ma, ti ɗa maalɔ ga faaɓa golaiti, nii tiya ɓɔɠɔi ti la ɠɛni zooga gaama ɠɛzɛɠɛzɛ bo su. 8 Pɔle woozuɠulani, é ɠɛ ma: «Gè la faa nɔpɛ gaazani Zuifuiti ta-lɔgi ma, ta GALA sei ʋɛlɛi ma, anɛɛ masagi Sezaal ɓalaa ma.» 9 Tɛi Fɛsɛtuse ɠɛni pɔ é Zuifuiti ziima vai ɠɛ, é ɠɛni Pɔle ma: «Ɗa pɔ ga è li Zeluzalɛme, ade pɛ ade yɛ ná ɗa-lukpɔi ɠaaleʋe gàazu, é lo niima vai ʋa?» 10 Pɔle gooɠaaʋoteni, é ɠɛ ma: «Ɓa-o, nà loni ʋɛ masagi ná-tukpɔɠaaleʋezuʋɛ, ʋɛ ɠa nà-tukpɔi ɠaaleʋezu ná. Gè la telebotala vaa nɔpɛ kɛɛni ga Zuifuiti, eɠɛʋelei ɗa ɓɔɠɔi è naa ɠwɛni la. 11 Ni nà ga sɔba nu, ɓaa ni gè faa ɠoloɠologɛ, nii soloogai saai ma, gè la ɠɛlɛni nɔ̀un saa vai ʋa, kɛlɛ ni gaama nɔpɛ ge la niiti ta-ɓaazaɠai zu, nii ti bosu ga ze, zobo ge la nu nɔpɛ zea ga é nɔ̀un fe ti ya. Nà wooɠulazu masagi Sezaal ma, gè suɠula ma.» 12 Siɛgi zu Fɛsɛtuse ta nu wolaiti ti ɓeni la ga un pɛɛ ɓɔɠɔ ʋa, é Pɔle wooɠaaʋoteni, é ɠɛ ma: «È wooɠulaa Sezaal ma, naa ɠa é ba, kɛni niina è li nɔ ti Sezaal ɠakala.» 13 Ku ɠɛɛni fele, naa ʋoluma masagi Agilipa ta Ɓelenise ti ʋaani laaliizu Fɛsɛtuse ma, Sezalé. 14 Tɛi é ɠɛni ku ɠɛɛzu ná fele, Fɛsɛtuse Pɔle ná-fai lɛɛni ga masagi, é ɠɛ ma: «Felikise zunui ɠila zɛgɛ ʋɛ kasoi ɠa. 15 Siɛgi zu gè liini la Zeluzalɛme, zalaɠa ɠula ɠundiɠiiti ta Zuifuiti ta-lotuɠɔiti ti ɓaazaɠani ga daalɔɠɔ, ti ɠɛ gè ná-saa vai leve. 16 Gè ɠɛni ti ma: ‹Wɔlɔme nuiti ti la ɗa ga nui zaa vai levea nɔ, ni ti la ma nui loni maalɔɔ nuiti kakala, ti ʋa lukpɔ ta naati é woozuɠula.› 17 Naa ɠa é kɛɛni ti ʋaani ʋɛ, gè la ku ɠili toni ma, poluma zobui nɔ gè zeini tukpɔɠaaleʋezuʋɛ, gè devei veeni ga ti ʋa ga zunui naa. 18 Gè ɠɛni ɠisiɛzu ga kpɔɛɲɔɠɔiti ta ʋaazu maalɔɔzu ga faaɠaaza golaiti, kɛlɛ naa la ɠɛɛni. 19 Nii ɓaagi é ɠɛni ti yɔɠɔzu, naa ɠɛni nɔ ga fai tanigaa ti ʋilɛgai ta-ɠala pelei ʋa, ta zunu ɠila nii daa ga Yesu, nii é zaani, tama Pɔle ɠɛɛzu ma toɠa vulua. 20 Gè pɛtɛni ga gè la zooga deve nɔpɛ seɠezu naa ɠɛɠala vai zu, naa ɠa é kɛɛni, gè Pɔle ɠaazaɠani, ni toɠa pɔ ga é li Zeluzalɛme, ti ná-tukpɔi ɠaaleʋe miná. 21 Kɛlɛ Pɔle wooɠulani niina masa golai ma, é naa ɠwɛɛ faa loo ná-fai zu, gè deveʋɛ ga ti makɛ ba kasoi ɠa eyɛsu gè teʋe Sezaal ma.» 22 Agilipa ɠɛni Fɛsɛtuse ma: «Nà ɓalaa nà pɔ gè zunui naa woomɛni.» Naa ɠɛ ma: «Lina ɗa goomɛni.» 23 Poluma voloi Agilipa ta Ɓelenise ti lɛɛni tukpɔɠaaleʋe ʋɛlɛi wu lɛbiya wolai zaama, kɔɔɠuluɓaiti ta taazuʋɛ nu wolaiti ti ɠɛni ti ʋolu. Fɛsɛtuse devei veeni ti ʋa ga Pɔle. 24 Naama ziɛgi zu Fɛsɛtuse ɠɛni ma: «Masagi Agilipa ta wɔigi pɛ wo gi ɠoba, zunui nii é wo ɠakala, nii ɠa Zuifuiti ti ma ʋɛbɛ wolai ʋaani, ti ɓaazaɠa mà ga daalɔɠɔ Zeluzalɛme ta taai nii zu, ti ɗa ɓain, ti ɠɛ zunui nii maa la mɔ nɛɛni, é ʋa yɛ vulua. 25 Nɔ̀un gè kaaʋɛ ga é la faa ɠaazani, nii nu a paa su, kɛlɛ tɛi tɔ ɓɔɠɔi é wooɠula masa golai ma, gè ɠisiɛʋɛ ga soloogɛ ga gè teʋe naa ma. 26 Kɛlɛ tama faa ɠiteɠite ge la ná, nii nà sɛʋɛ ná-faa zu masa golai ma, naa ɠa é kɛa gè toliga wo ɠakala, kɛlɛ ɗa ɠiteɠite è ɠakala, masagi Agilipa, naa ɠa a kɛ ada ɓena ga gaazaɠa, gè ɠɛ kwɛɛ nii gè ʋaazu sɛʋɛzu. 27 Tɔɔzei toɠa bɛ̀ ga keleɠeletala va ga gè kasoɠa nu leʋe, ni gè la sɔgi ɠulani kɛlɛma, nii é laani unma.»