Zephaniah 3 (TOMA)

1 Nimizai ɠa kololala laai ʋɛ, kɔzɔai,é ga nu ʋaa laai! 2 É la woiloni toligi ma,é la vaazu maaɠoloi wu,é la ɓɔɠɔ ɠalivaazu Ɠɔoɠɔ GALAGI ma,é la ʋoluzeizu ná-GALAGI ʋa. 3 Ná-kundiɠiiti ti náta ga zalaiti ti zikɔzu,ná-tukpɔɠaaleʋe nuiti ta ga zuluɓuiti ti kpɛgi wosu kpidii,ti la tanɔpɛ makɛsu, ti ʋa mi sobui. 4 Ta-ƓALA goo wo nuiti ti la ga totuɠɔ ʋagɔ,ta ga yaava nuiti.Ta-zalaɠa ɠula nuiti ti la unfema veezu aniiti bɛ ti veai GALA bɛ,ta ná-tɔgiti koloɠolosu. 5 Anɛɛ naa ʋe, Ɠɔoɠɔ GALAGI ɠa ná, taazuʋɛ,é ɗa ɓɔɠɔ lɛ ga telebo nu ʋe,é la faa ɲɔu nɔpɛ kɛɛzu.Sobu-o-sobu, zeɠema la ba, toɠa ná-tukpɔiti gaaleʋezu.Kɛlɛ faa ɲɔu ɠɛ nui la ɗa ga unfe pɛ. 6 «Gè ziiti suwuɠaaleʋea,gè ti-velesuʋɛti suɠoloɠolo.Gè koi yɔɠɔzuʋɛti koloɠologa,nu nɔpɛ ge la mɔ ziɛzu náti.Ta-laa wolaiti suɲakai ɠɛ de,nu ɠila kpalaa ge la mɔ zeini ná. 7 Kɛlɛ gè ɠɛni ma:‹Ɗa unfe mà, è tɛnɛ gooi zo,naa ɠa a kɛ, è-zeizuʋɛ mina ɠoloɠolo.›Gè ti loɠani siɛ mɔinmɔin su,kɛlɛ ti ɠɛni ɠaazuvilɛzu ga faa ɲɔi ɠɛa,ti-ɠɛɛ vai pɛ su. 8 Naa ɠa é ba, à màaɓɔun,ungo, à naama voloi maaɓɔun,yeei gè ʋaazu wuzeɠezu la kɔɔzoganii vaa zu.Gè devea ga gè ziiti ta masadaiti gaalɛ ba,ga gè nà-ziiɠaawana wolai zei ti ma.Eteai pɛ ka ɠala ga nà-ziiɠaawana abui,» Ɠɔoɠɔ GALAGI wooi ɠana. 9 «Naazu nà nuɓusɛiti maavalibo,nà ti-lakɔlɔgiti ɲade,ta fàli, nɛ̀i gè ga Ɠɔoɠɔ GALAGI,ti pɛ ta dɛ̀bi ga yiimaʋɛ pɛ. 10 Anɛɛ Etiyopi ɗɛ wolai ʋoluʋele nuu,dɛ̀bi nui, niiti gè ti vazani,ta ʋa pɔ̀ ga ta-vebɛaniiti. 11 «Naama volo ná, nà-nuɓusɛiti,wo la mɔ unfega ga wo luʋa ʋeleiti faa,kotoi niiti wo ti ɠɛɛni dàalɔɠɔma.Nà naati pɛ kula wo zaama,zɔiti ti laavegai ga wasogi,wa ɓe niina waso fai ʋa nà-gize ɲadegai ma. 12 Nà nuɓusɛiti makɛ wo zaama,ti ga ɓɔɠɔmaayei nuiti ta ti ʋalagai,ta ɠɛ velesu Ɠɔoɠɔ GALAGI ʋolu. 13 Izilayɛle nuɓusɛi mɔtaiti ta ɠɛ vulua,ti la mɔ telebotala vaa nɔpɛ kɛa,ti la mɔ zɛɛ nɔpɛ boga,ti la mɔ yaava vaa nɔpɛ kɛa ga ti-laaʋɛ.Ta zoo ti daami wo, ti ɲiimɛni ʋagɔi wo,nu nɔpɛ ge la ti maalua.» 14 Ee, Siyɔn nuɓusɛiti, à vuka ga koozunɛɛi!Ee, Izilayɛle nuiti, à ɠɔkɔ ga koozunɛɛi!Ee, Zeluzalɛme nuɓusɛiti, à ɠoozunɛ ga wo-yiimaʋɛ pɛ! 15 Ɠɔoɠɔ GALAGI peelala vai ma ɠasɔi zeɠea wo unma,é wo zili nuiti kpɛa wo ʋolu.Izilayɛle ná-masagi, Ɠɔoɠɔ GALAGI ɠa wo zaama,maa la mɔ nɛɛni wo ʋa lua maanɔɠɔ ʋa. 16 Naama volo ná, ta ɠɛ Zeluzalɛme ma:«À mina lua, Siyɔn nuɓusɛiti,wo iɲɔ ge mina leʋe pa! 17 Mazɔlɔɔ Ɠɔoɠɔ GALAGI wa-ƓALAGI ɠa wo zaama,ga kɔɔɠɔ ɠuluɓai é wo ɠizosu.Toɠa wo ɠaanɛɛnɛzu ga ná-nɛɛbɛi,toɠa koozunɛ wuyei loo wa-vaa zu.» 18 Maliɠii ɠɛ ma: «Nà maanɔɠɔ vaiti kpe wa-vɛti voloiti ba,niiti ti ɠɛa wo unma ga kasɔi ta zelilomai. 19 Wɛlɛ, naama ziɛgi zu, nà vɔɔɠu naati pɛ ba,niiti ti wo zopele ɲɔuni.Nà naati balo, niiti ti lɛkpuzu,zɔiti ti loai ya, gè naati gaalɛ ba.Nà wo ɠɛ ga unfema nuiti,wo-lɔɠɔi ɠula zooiti pɛ su,ʋɛti unfegi zeelini wo ma náti. 20 Naama ziɛgi zu, nà ʋa ga woye ʋolu,siɛgi zu gè wo ɠaalɛɛzu ba la ʋolu,nà wo-laaseigi wɔɔlɔ, lɛbiyai ɠɛ wo ʋɛeteai zu nuɓusɛiti pɛ saama.Nà naa ɠɛ siɛgi zu,gè wa-vaiti maavalibosu da, wa ɓɔɠɔi wo ɠaazu.»Ɠɔoɠɔ GALAGI ɠa é boga.

Zephaniah 3 (TOMA)

In Other Versions