John 20 (TOMA)
1 Dɔɔɠɔi ma volo mɔungi, Magedala nui Mali liini kabalaʋɛ ga gosui, wozai zuɓidini dɛ. É pɛtɛni ga kɔtui zeɠeʋɛ kabai la. 2 É ɓizɛni, é li, é Simon Piyɛlɛ ʋɛtɛ ta kaladopoi nii é nɛɛni Yesu ʋɛ, é ɠɛ ti ma: «Ti Màliɠii ɠula kabai zu, gi la kwɛɛ, ʋɛ ti daai ná.» 3 Piyɛlɛ ta kaladopoi zɔi ti ɠulani ga ti li kabalaʋɛ. 4 Ti felegɔ ti ɠɛni ɓizɛzu ʋɔɔma, kɛlɛ kaladopoi zɔi ɓizɛni, é leʋe Piyɛlɛ ʋa, é zɔɠɔzu yɛni ti ʋa, tɔ ɠa mɔunpa é zeelini kabalaʋɛ. 5 É unmaalaani, é seɠe zakpaiti ka, niiti ti ɠɛni ná, kɛlɛ é la ɠɛni lɔɔni kabai zu. 6 Simon Piyɛlɛ nii é ɠɛni ga poluʋelei, naa ɓalaa ʋaani. É lɔɔni kabai zu, é seɠe zakpaiti ka, ti laani ná. 7 Seɠe zakpai nii ti feleveleni Yesu nɔungi ma, naa la ɠɛni zɔiti koba, maaɓilikpiliga ɠɛni de, é ʋuuni yɛ ada ɠili. 8 Kaladopoi zɔi é zeelini mɔunpa, naa ɓalaa lɔɔni kabai zu, é ná ɠa, naa ʋoluma é ɠidaaleʋe. 9 Tɔɔzei, eyɛsu naama ziɛgi zeeli, é la ɠɛni dɛ gaaɠaani ga kɛni Yesu a la wuzeɠe, é ɠula saai ya, eɠɛʋelei GALA Sɛʋɛi bosu la. 10 Kaladopoiti ti ɠaleni ma ta-ɠoizu. 11 Naama ziɛgi zu, Mali ɠɛni loni eteaʋɛ, kabai ɠobaʋɛ, é ɗa wɔlɔ. É yɛni wɔlɔzu, é maaʋɛ ga é unmaala kabai zu. 12 É geezuɠeela felegɔ ɠaani, ti zeini ʋɛ Yesu ma ʋoomai ɠɛni laani ná, gilagi zeini ga unbua ʋelei, zɔi zeini ga kɔɠɔa ʋelei. 13 Ti ɠɛni ma: «Anzanu, lee vaa zu è wɔlɔzu?» É ti wooɠaaʋoteni, é ɠɛ ma: «Ti Màliɠii ma ʋoomai zeɠeʋɛ ʋɛ, gè la kwɛɛ ʋɛ ti daai ná.» 14 Siɛgi zu é ɠɛni naa wosu la, é latini, é Yesu ɠa loni ɠobaʋɛ, kɛlɛ é la ɠɛni kwɛɛni ga Yesu ʋe. 15 Yesu ɠɛni ma: «Anzanu, lee vaa zu è wɔlɔzu? Ɓɛ ɠa è gaiziɛzu?» Tɛi é ɠɛni kaazu ga kpele makɛ nui ʋe, é ɠɛni ma: «Màliɠii, ni ɗa ɠa è seɠeai ʋɛ, ʋɛ è daai ná, miná lɛ ga ze, gè li, gè seɠe.» 16 Yesu ɠɛni ma: «Mali!» É latini, é ɠɛ ma Eɓulu wooi zu: «Laaɓuni» (nii poluʋɛ ga «kalamɔn»). 17 Yesu ɠɛni ma: «Mina sò, tɔɔzei gè la dɛ lɛɛni Kɛ̀ɛ ʋɔ bɛ. Tɔun liina, è ɠɛ kɛ̀ɛlointi ma: ‹Nà ga lɛ Kɛ̀ɛ ʋɔ bɛ, nii é ga wo-Ɠɛɛ, nà-GALAGI ʋɔ bɛ, nii é ga wa-ƓALAGI.› » 18 Magedala nui Mali liini, é ɠɛ kaladopoiti ma: «Gè Màliɠii ɠaaʋɛ! Wɛlɛ ʋele ɠa kpɔɛai la pɔ̀.» 19 Dɔɔɠɔi ma volo mɔungi naa nɔ, kpɔkɔi, kaladopoiti gaalɛa ɠɛni de ba pɛlɛi ta wu, ti kpogiti daaɠuluni kpekpe, tɔɔzei ti ɠɛni luazu Zuifuiti ta-ɠundiɠiiti ba. Ti yɛni ná, Yesu ʋa, é lo ti zaama, é ɠɛ ti ma: «Ziilɛigi ɠɛ wo ʋɛ.» 20 É naa wogai ma ti ma, é zeeiti ta kokakamaʋɛ lɛɛni ga tiye. Kaladopoiti ti Maliɠii ɠaai ma, ti wola ɠoozunɛɛni. 21 Naa ʋoluma é ɠɛni ti ma mɔnɔ: «Ziilɛigi ɠɛ wo ʋɛ. Ʋelei Kɛ̀ɛ tèʋegai la, zekana nà ɓalaa gè wo leʋesu la.» 22 Siɛgi zu é naama wooi woni da, é laavuuvuuni ti ma, é ɠɛ ti ma: «À Zɛnvu Ɲadegai zɔlɔɔ. 23 Zɔiti nɔpɛ wo ti zuvaayɛsu ga ta-ɠotoiti, ti maavaa ɠa yɛ, kɛlɛ zɔiti nɔpɛ wo la ti zuvaayɛni ga ta-ɠotoiti, naati ta-ɠoto ɠasɔi ɠa yɛ ti unma.» 24 Keela puugɔ maazu felegɔi (12) zaama, zɔi daaseigi ga Tomase, ti tolisu ɓalaa ga «Yoogi», naa la ɠɛni ti ʋa, siɛgi zu Yesu ʋaani la. 25 Kaladopoi zɔiti ti ɠɛni ma: «Gi Màliɠii ɠaaʋɛ.» Kɛlɛ é ɠɛni ti ma: «Ni gè la kɔlu ɠaazoɓagiti pogi ɠaani zeaʋɛti, ta gè ʋa zèeɓeɠaiti dɔ kɔlu ɠaazoɓagiti pogiti su, ni ɓalaa gè la yeeʋɛɛni kokakamaʋɛ, gè la laa da pɛ!» 26 Folo lɔsaʋa ɠulani su, naa ʋoluma Yesu ná-kaladopoiti ti ɠaalɛɛni ba mɔnɔ pɛlɛi wu, Tomase ɠɛni ti ʋa naama yeei. Pɛlɛi laaɠuluni mɔnɔ kpekpe, kɛlɛ Yesu ʋaani, é lo ti zaama, é ɠɛ ti ma: «Ziilɛigi ɠɛ wo ʋɛ.» 27 Naa ʋoluma, é ɠɛni Tomase ma: «È-yeeɓeɠai lɔ ʋɛ, wɛlɛ zèeiti ba, ʋa ga è-yeei, è pɛɛ kòkakamaʋɛ ʋa. Mina ɠɛ ga kidaaleʋelala nu, kɛlɛ ɠidaaleʋe.» 28 Tomase ɠɛni ma: «Màliɠii ta nà-GALAGI!» 29 Yesu ɠɛni Tomase ma: «Tɛi è kàai, naa ɠa é kɛa è ɠidaaleʋeai! Tama, undaanɛ nu ɠa ga naati, niiti ti ʋaazu ɠidaaleʋezu, tama ti la ɠaazulaani mà.» 30 Yesu laavɔɔ vaa mɔinmɔin kiligaa ɠɛɛni ʋolu ná-kaladopoiti gaazu, niiti ti la zɛʋɛni niima zɛʋɛi zu. 31 Kɛlɛ niiti ti zɛʋɛai ʋɛ, naati sɛʋɛʋɛ, nii a kɛ wo la da ga Yesu ɠa é ga Kilista, GALA Doun Zunui, ta nii a kɛ wa laana da, wo zɛnvui zɔlɔɔ ga maaʋele.