Job 33 (TOMA)

1 «Niizu, Zɔɓe, woilo dɛɛ kìsu vaiti ma,woilo gòoiti kpein ma. 2 Wɛlɛ, nà laalaosu,nɛ̀gi ɓɔɛ è ʋɔ. 3 Zìi ná-sɔledai ɠa nà-kpɔɛiti ti ɠulazu su.Kala kitei ɠa dàaʋɛ bosu. 4 GALA Zɛnvui ɠa é kpɛ̀tɛai,Zɛbɛi-Pɛ-Maliɠii ná-fiilɛi ɠa é zɛ̀nvuzu. 5 Ni ɗa zoo, gòoɠaaʋote,ɗa-ɠɛʋele ɓɛtɛiti kɛ, è lo gàazu! 6 GALA gaazu, nà ga è ɠɛʋele,kpɛ̀tɛʋɛ ga pɔlɔi. 7 Naazu è la ɓalia ga dualuagi nɔ̀un gaazu,ɓaa è ʋa ɠisiɛ ga nà-zobogi ɠa è ɠoloɠolosu. 8 «È boni, é loo gòizu,gè è-laawooiti mɛnini ga: 9 ‹Ɲàdegɛ, tɔ koloɠolo ge la bà.Kòleʋɛ, gè la faa nɔpɛ gaazani. 10 Anɛɛ naa ʋe, GALA ka faiti kpɛtɛzu dàalɔɠɔma,é ɗa pɛ̀tɛ ga zili nu. 11 É kɔlui ʋiliga kɔ̀ɠɔiti ba,é ɠaazulo kɛ̀ɛ vaiti kpein ba.› 12 «Nà è wooɠaaʋotesu ga, gaama la è ya naa zu,mazɔlɔɔ GALA bɔɔlɔʋɛ nuɓusɛi ʋa. 13 Leeni vaa zu è pɔ è tɔun maaɠaali,tɛi é la ɗa ga ɗa-ɠaazaɠagiti gaaʋotesu vai ʋe, è ti ʋilisu ma? 14 Anɛɛ naa ʋe, GALA ka ɗa ɓɔɛ,ná ta ga pelei nii, ɓaa nuuma ʋelei,kɛlɛ nuɓusɛi la ɗa ga ɠida bu. 15 Toɠa ɗa ɓɔɛ ga segi ta kulakɛlɛmai kpidii,siɛgi zu ɲiimɛni wolai nuiti kpein sosu da,siɛgi zu ti ɲiizu la ta-ʋeteiti su. 16 Názu ɠa a ɗa kulakɛlɛmai ɠɛ la nuiti bɛ,kalagi é bosu, é maaɓakpa, 17 nii a kɛ é nuɓusɛi zeɠe ná-kɛɛwotiiti polu,é ti makɛ, ti mina loo wasogi zu. 18 Zekana é ti-yɛnvui ɠizosu da kabai ma,toɠa pele leʋesu ti luɠɔ ga ti mina ʋilɛ pelei naa ma é liizu gɔvɛalaazu. 19 «Nui ɠa ɗa yɛ daazuʋɛ ga taɓai maaʋele, é ɠigi zɔlɔɔ, é lɛnɛ,siɛgi zu seeɓɛi kaeiti kpalizu la, dooɠo ge la ba. 20 Naazu ɓului ɠa ɗa ɲɔu da,anɛɛ daamianigi niiti wɔinɗai ga tiye gola. 21 Kɔlɔgi ɠula ma, é ɠaɲa, nu ɠaazulosu la ba,kaeiti nu la ɠɛa ti ɠaazu, naati ti ɠula kɛlɛzu. 22 É maaɓuɠaa kabai ʋa.Zɛnvui ɠa niina saa ɠeezuɠeelaiti zea. 23 Kɛlɛ ni GALA ná-geezuɠeelai gila ga ɠɛna zunui naa ɠoba,é ɠula waagiti saama, é pele zɔlegi lɛɛ la, 24 naazu toɠa zaalai la ma, é maawɔinɠa, é ɠɛ GALA ma:‹Mina zɛ ná, é ʋa yei kabai zu, gè unmɔɔ ganii zɔlɔɔga,› 25 názu ɠa kpusɛi niinɛzu la eɠɛ ná-doungo ziɛgi zu,é ɠale ma ná-doungoyai ma voloiti ma. 26 Toɠa wooɠula GALA ma, naa yeezei bu ga pagɔ,é lo gaazu ga koozunɛ wooi.Mazɔlɔɔ GALA ka kwɛɛsu ga niinɛ ga telebo nui. 27 Toɠa too ga guyei ɛsɛ pɛ gaazu, é ɠɛ ma:‹Gè koto ɠɛɛni, gè tɔgi ɠoloɠolo.Kɛlɛ GALA ge la sòni ga nà-faaɠaazagi, é ʋa dòɠa. 28 GALA ge kùlani kabai zu,zɛ̀gɛ vulua, gè wozakalagi ɠa.› 29 Pɛtɛ, GALA ka naa kpein kɛɛzu nui ʋɛ,ná ɠɛ fele, ná ɠɛ saʋa, 30 nii a kɛ é zɛnvui ɠula ʋolu kabai zu,é fulu nuiti ta-wozakalagi ve zea. 31 Lo dɛɛ, Zɔɓe, woilo gòoi ma!Maaɠɛ kpɔ, gè zoo gè ɓɔɛ è ʋɔ. 32 Anɛɛ naa ʋe, ni gooɠaaʋote ka è ya, bo,mazɔlɔɔ kòozu ɠa nɛɛ, gè ɠɛ è ma, gaamai ɠa è ya. 33 Ni faa la è-la, è ʋa bo, maaɠɛ kpɔ,è woilo gòo ma, nà è ɠalasu ga ɠimalai.»

Job 33 (TOMA)

In Other Versions