Revelation 18 (BBT1E)

1 Ji pha idoh shii gu è gai hamangkhliie yi hamangkhung re-è wuii ruii pha doh. Aishii ne boh riichai um, chiih-è airo muchuang re-è zab sohnyiak ne sang rey dun ro. 2 Ai è gang gow re-è ziak mage: “Ai ne chiihdun! Boh Babylon ne chiih dun! Ibuiithek nane izia ragungthek ne aishii rai dun ro; zab ichuathek pha izia nane khiijai pha fuiithek ne aishii rai dun ro.” 3 Zab pha sohthek ne airo phuii niing ne phuiithiig ne—Hò-amuii ro gang siulao pha phuii ji ro. Sohnyiak pha sajathek ne ho-amuii shii siulao rek ro, chiih-è sohkhung pha chongjaipho ne ai è bangchiie chid pha ji re-è ithek ne bukho rey dun ro. 4 Chiihphado gai goh yi hamangkhung re-è yao pha gu è yoi,“Fuang hà khia bo, gu branthek! hò-amuii ji re-è fuang khia bo!Nathek ne hò-amuii layog shii ichua arek rabo;Nathek ne hò-amuii ro lago shii athang rabo! 5 Hò-amuii ro layogthek ne khudungkhudung ne hamangkhung hà thog sha dun ro,chiih-è Hamangkhung-aphuii ne airo awie pha lumuiithek shii ne nowkhlei ro. 6 Hò-amuii è nathek shii khui pha duiine aishii de khui bo;Ho-amuii è rek pha zab shii nyirang è idoh phi bo.Ai è nathek shii phuiikho saro pha duiine.Nathek ne ji è de weg phuiikho shii airo gog shii ley phi bo. 7 Ai awai shii biisiie nane ichad chai sieng pha duiineho-amuii ai ro khama um pha diig nane duhug phi bo.Ho-amuii awai è yao pha:‘Ichiih gu ne sajamuii ro!Gu ne misiungmuii asi ro,Gu ne duhug ne khuchungde athieg ro!’ 8 Nyieliieshii ji ne, inai jia hò-amuii ne awie pha muathek rog shii è diig ruii phromiiriiethek, duhug nane nokhonosiie. Rey ruii phro.Chiih-è aishii ne bai re-è ziao ruii phro,Nyieliieshii hò-amuii shii chua pha Ithong Hamangkhung-aphuii ne zabboh ro.” 9 Sohnyiak pha sajathek ne hanyie è ai rog shii siulao nane chid pha ji shii thang gieng pho ne ziak ruii phro chiih-è aishii ziao pha ji re-è mukham yi ithek è riig mage shii ji pha rajan lakhung shii choh ruii phro. 10 Nyieliieshii ithek ne airo diig shii thang pha ji rum ne, ithek ne ruang hà riu ro. Ithek è yao, “Khinyama buii ro! Khinyama buii ro! Hì pha boh nane boh rajan Babylon! Nathek shii ne ishak jia shii Lago phijong ro!” 11 Sohnyiak pha chongjaiphothek airo chiang cho ne zo ruii phro, nyieliieshii ithek ro manathek shii hanyie de apheg phro; 12 ithek ro manathek san, luman, igong lubaothek, chiih-è zithek ne; ithek ro manathek pha igong yung imo, iphi yung, yungsiu nane, ishaig yung; zab ithua hà amua pha hingthek zab pha ichuathek nyathong shiinyin re-è rab pha chiih-è igong hing, dau, shiie, nane marble, 13 chiih-è dalchini, masala, bisi, siiriie, chiih-è rem no; phuii nane thiiliie, muhab nane phiug, shuwuii nane shiishai, sthuhthek chiih-è hanthek, khiaothek nane tharohthamang chaithek shii rang de hanyie apheg ro. 14 Chongjaiphothek è aishii yao, “Zab wie mana nawai chid pha ji ne san dun ro, chiih-è zab naro nuruii nane biisiie nyuii pha ji ne san dun ro, chiih-è nane jithek shii din ne amua sha ruii phro!” 15 Chongjaiphothek, hanyie yi ji pha rajan re-è chong rek ne bukho rey pha ji ne ruang riu dun phro, nyieliieshii ithek ne ai ro diig pha ji thang pha rum. Ithek ne choh ne zo ruii phro, 16 chiih-è yao, “Khinyama buii ro! Boh rajan shii ne khinyama buii ro! Ai ne awai shii igong pha yung, iphi, chiih-è yung shaig, chiih-è ai ne awai shii san mukhothek, igong lubaothek, chiih-è zithek re-è chaig ruii phro! 17 Ai ne ishak jia shii awairo nuruii ne zab mua dun ro!”Zab pha runboh dumuii nane inphothek, khiyidpho chiih-è gai hanyie khamuii è wiang pho ne ruang hà riu dun ro, 18 Bai miriak pha mukham hò-amuii shii ziao pha ji riig ne gang ziak mage: “Hì è rek pha boh rajan duiine gai rajan oi ro!” 19 ithek è ai khrugthek shii nyiak hà fen muii ro, ithek ziak ne zo ne yao, “Khinyama buii ro! Rajan boh ne khinyama buii ro! Ai ne rajan ro zab hanyie yi khamuii hà runboh khiyidpho ne airo nuruii è bukho rey ro! Chiih-è ishak jia shii ai ne zab mua dun ro!” 20 Sang bo, hamangkhung, nyieliieshii ai ne mua dun ro! Sang bo, Hamangkhung-aphuii ro branthek nane guaphasamoythek chiih-è chaigthek! Hamangkhung-aphuii ne ai è nathek shii nyie rek pha ji shii the muii ro! 21 Chiihphado bohblu hamangkhliie è rathak nyaboh lubao jia chiing ne khamuiiboh lakhung shii fen mage ne, yao, “Hì pha boh rajan Babylon ne khinyama awiedang pha fen muii ne chiih-è khuchungde adoh sha ruii phro. 22 Benthek pha thiibiingkhinkheb nane tharohthamang gow pha, flui boi pha ji nane thu-ung ne nathek ro iliing shii khuchungde din ne ayoi sha ruii phro; chiih-è chongjai rek pha ne nathek ro iliing shii adoh sha phro, chiih-è rathak pha roh ne oi sha ruii phro! 23 Din ne khuchungde muchuang pha ichuang ne nathek shii adoh sha ruii phro; phiyiybufuiithek nane phiyiybimithek ro gow roh pha ne nathek shii ayoi sha ruii phro. Nathek ro chongjai ne sohkhung shii bajo blu um, chiih-è nathek ro biidiie pha jadu è sohkhung pha zab branthek shii khinrin ro!” 24 Babylon shii ne lago phi ro nyieliieshii chaigthek nane Hamangkhung-aphuii branthek ro ifai ne ji pha rajan hà doh ro; um, jithek pha ifai ne hanyie shii sohnyiak shii ua muii pha ji ro.

Revelation 18 (BBT1E)

In Other Versions