Revelation 18 (TOMA)
1 Naa ʋoluma, gè geezuɠeelai taɠili kaani, é yei, é zeɠe geezuʋɛ. Zobo golai ɠɛni zea, é ɗa volo, ná-foloi eteai pɛ suɠalani. 2 É kpeei looni, é wooɠula la, é ɠɛ ma:«É loa bu, é loa bu, Ɓaɓilɔne taa wolai!É ɠɛa niizu niina ga inɛgiti seizuʋɛ,ta kɔzɔba yɛnvui pɛ dɔɔɠuzuʋɛ,wɔni ɠɔzɔai ma zii pɛ wɔinzeɠeai, naati puuzuʋɛ. 3 Mazɔlɔɔ é ná-koloɠolo ziiɠula dɔɔi loni ziiti pɛ da, ti ɓɔɔle la.Eteai zu masagiti ti ɓɔɠɔ lɔɔni koloɠologi zu ta tiye,eteai zu yaaɠoiti ti ɠɛni ga naavolo nuiti, ná-kpɛtɛi lateʋegai maaʋele ma.» 4 Gè woo taɠili mɛnini, é zeɠe geeɠɔlɔgi zu, é ɗa ɠɛ ma:«Nà-nuɓusɛiti, à ɠula Ɓaɓilɔne ʋa,naa ɠa a kɛ, wo mina ʋɔɔpɛɛ ná-kotoiti ba,wo ʋa wɔnɔ zɔlɔɔ ná-nimizai zu, é ʋaazu sɔlɔɔsu. 5 Mazɔlɔɔ ná-kotoiti ti ɠaaɓɔga ba, eyɛsu é zeeli geeɠɔlɔgi ma,GALA ge la yeemani ná-telebotala vaiti ma. 6 À sala, eɠɛʋelei é ɠɛni salai wosu da.À ná-kɛɛwotii ma ʋɛɛda felegɔi ve zea.Ziawɔi é puuni su wo ʋɛ, à ma yeeɠaaɓaagi ɠɛ su fele, wo fe zea. 7 Ʋelei é ɓɔɠɔ wɔɔlɔni la,é lɔ ɓɔɠɔyiimaɠɛɛi zu,à kpɔlɔi ta nimizai zei ma ɠana nɔ!Tɔɔzei toɠa ɠɛɛzu yiimaʋɛ:‹Nà zeini anzanu masadai zu, gè la ga poanza,eyɛsu pɛ gè la gaazuɗɛʋu zɔlɔɔga pɛ!› 8 Naa maaʋele ma, ná-nimiza vaiti ta zei ma ʋɔɔma folo ɠila daawu,saa zeeɓɛi, gaazuɗɛʋui, pului, toɠa ɠala ga abui.Mazɔlɔɔ Maliɠii GALA nii é tɔun tukpɔɠaaleʋea, zobogi ɠa bɛ.» 9 Etea masagiti, niiti ti ɓɔɠɔ lɔɔni ná-koloɠologi zu ta tiye, ta ná-ɓɔɠɔyiimaɠɛɛi, ta wɔlɔ, ti ɗa ɓɔɠɔ maawɔin ná-faa zu, siɛgi zu ti taa wolai ɠala luului ɠaazu la. 10 Ta lo ɠoozama, kpɔlɔi é zeizu ma, naa ma luai maaʋele ma, ti ɗa ɠɛ ma:«Ee, nimizai! Niima nimiza ɠa ga lee!Ee, Ɓaɓilɔne, taa wolai ná-zobogi wɔɔlɔai!Yeeɠɛɠala ɠila kpe nɔ daawu, peelalai ma ɓakɔi zeelia è ma!» 11 Etea yaaɠoiti ta wɔlɔ ɓalaa, ti ɗa ɓɔɠɔ maawɔin ná-faa zu, tɔɔzei nu nɔpɛ ge la mɔ ta-zɔɔlaiti ta ɠeyazu, 12 ta-yaaɠo zɔɔlaiti ti ga zanugi, walii, ta kɔtu zɔngɔ ɓaagiti, naa ʋɛɛ kɔtu zɔngɔ ɓaagi ʋa é ga pɛɛlegi, ta geze ʋagɔ zeɠei, ta ma ɓɔigi, ta ma ɓɔi sɔsɔgi, naa ʋɛɛ soa zeɠei ʋa, ta gulɔ maku nɛɛnɛ guluiti ma zii pɛ, ta anii ma zii pɛ kpɛtɛai ga see ɲiigai, anii kpein kpɛtɛai ga gului nii pagai gola, naa ʋɛɛ kɔlu ɓɔigiti ba, ta kɔluiti, ta kɔtui daa ga maaleɓelegi, 13 kanɛlegiti ɓalaa, ta tufa maku nɛɛnɛgiti, naa ʋɛɛ gulɔ maku nɛɛnɛgiti ba, naa ʋolu miilegiti, ta ansansegiti, ta dɔɔi, naa ʋɛɛ gulɔi ʋa, ta ɓulu vukɔ ʋagɔi, ta moloi, nikɛiti ta baalagiti, naa ʋɛɛ sooiti ba, wotoloiti, ta duɔiti, naa ʋɛɛ kɔɔ luɔiti ba. 14 Yaaɠoi niiti ti ɗa ɠɛ taa wolai naa ma:«È yiima aniiti kpein ti wɔin ɠɛni è ma, ti ɲɛɛlɛa.Ani ʋagɔiti, aniiti ti volozu, ti pɛ ti loa ya è ya,è la mɔ ti zɔlɔɔga ʋolu pɛ!» 15 Yaaɠoiti ti ta-ɓɛtɛi zɔlɔɔgai yaaɠolai zu ti ɠɛni kɛɛzu taa wolai naa zu, ta lo ɠoozama, kpɔlɔi é zeizu ma, naa ma luai maaʋele ma, ti ɗa wɔlɔ, ti ɗa ɓɔɠɔ maawɔin, 16 ti ɗa ɠɛ ma:«Ee, nimizai! Niima nimiza ɠa ga lee!Taa wolai maaɠilini ga geze ʋagɔ zeɠei, seɠe ɓɔigi ta seɠe ɓɔi sɔsɔgi,é ɓɔɠɔ ɓɛtɛai ga zanugi ta kɔtu zɔngɔ ɓaagiti. 17 Yeeɠɛɠala ɠila kpe nɔ laawu, naama naavoloiti pɛ ti ɠoloɠologa!»Ɓato leve nuiti pɛ, ta ziɛ ɠaa ziɛ wo nuiti pɛ, ta niiti pɛ ti botii ɠɛɛzu ziɛiti ga, ta niiti kpein ti ɠɔnɔgi zɔlɔɔsu ziɛi ya, ti pɛ ti loni ɠoozama, 18 ti ɗa kpeei loo, ti ɠɛai ma gala luului ɠaazu, ti ɗa ɠɛ ma: «Taa wolai ɓɛgele ɠa kulaai ga taa wolai nii?» 19 Ti ɠɛni fufiligi ʋuuzu tɔungiti ma, ti ɗa wɔlɔ, ti ɠɛni gaalɛi zu, ti ɠɛni kpeei loozu, ti ɗa ɠɛ ma:«Ee, nimizai! Niima nimiza ɠa ga lee!Taa wolai, niiti kpein ɓatoiti ti ti ya kpoloɗɛi ɠa,ti pɛ ti ta-ɓɛtɛi zɔlɔɔgɛ ga tɔun saɓui,yeeɠɛɠala ɠila kpe nɔ daawu, é ʋalaga ti pɛ ma! 20 Geeɠɔlɔgi, ɠoozunɛ too vai zu bu!GALA ná-nuiti, wa ɓalaagi, keelaiti, GALA goo wo nuiti, à ɠoozunɛ!Mazɔlɔɔ GALA ge ná-tukpɔi ɠaaleʋea,tɔɔzei faa ɲɔi ʋa é kɛɛni ga woye!» 21 Názu ɠa geezuɠeelai sɛbɛi wɔɔlɔai gola, naa kɔtui zeɠeni la buiɗai ga molo ziɠa ɠɔtu wolai ɠɛʋele, é pili ya kpoloɗɛi wu, é ɠɛ ma:«Pele ɠana Ɓaɓilɔne taa wolai ʋilisu ya la ga maaɓaai,é la mɔ ɠaa eyɛsu pɛ. 22 Eyɛsu pɛ nu la mɔ kɔni goomɛniga taai tɛi su,ɓaa guye zoɠoa woo, ɓaa koole vɛɛ woo, ɓaa puʋu fɛɛ woo.Nu la mɔ anii ma zii nɔpɛ ma wotiɠɛ nu ɠaa ná.Nu la mɔ koda ziɠa lu nɔpɛ mɛniga ná. 23 Lanbo zeze la mɔ voloa ná pɛ.Anzazinigi ta anzai woo la mɔ mɛniga náʋɛ pɛ.Mazɔlɔɔ ɗa-yaaɠoiti ka ti ɠɛni ga zobobɛ nu wolaiti eteai zu,è nuɓusɛiti pɛ yaavani ga ɗa-zoɠo vai! 24 GALA goo wo nuiti, ta GALA ná-nuiti,ta niiti dɔin ti ti ʋaai eteai zu,è ʋɔ bɛ ɠa ti-ma ɲamai ɠaani ná.»
In Other Versions
Revelation 18 in the BOHNTLTAL
Revelation 18 in the KBT1ETNIK
Revelation 18 in the TBIAOTANT