Revelation 18 (KBT1ETNIK)
1 Hiwa thengli aleiilaak marwaan tirton inkhat marwaan makheiya ijuochum kha kei'n kaleimu. Ama ranak kha alok, halli ama ra-aang khan nuoipilchung pumpui kha alei-eelwar. 2 Ama'n rasa inringnga aleikheek: “Numeisanu kha apurjei! Inthang Babylon kha apurjei! Numeisanu kha raikhuo ngai, kathamak ratha ngai, akachok juli wa rakip ngai riaknamun ejei. 3 Ajarchu ama zool-inthai thona theibomju kangar kha phungli zaat rakip ngai'n ama theibomju khan inruijei. Nuoipilchung reng ngai khan ama le zool-inthai chuon inthojei, halli manmasituolla sial li sum kalou mi ngaikhan ama inchongna khan in-inchongjei.” 4 Hiwa thengli marwaan makheiya inphut kei'n rasa inkhat kaleijet,“Kei kami ngai heisuokru! Numeisanu makheiya heisuokru!Numeisanu manu ngaikhan nangni inchelmaru;Numeisanu rachaakna khan nangni inchelmaru! 5 Ajarchu numeisanu manu ngaikha marwaan katung inkamjei,halli Pathian in numeisanu kathamak chuon ngaikha ngaidonjei. 6 Numeisanu khan nangnidiang itho angnga nangni innum thotru;Numeisanu ileitho rakip ngaikha nangni'n amadiang pekirtaru.Numeisanu khan nangni sik-ah ileibool rabing khanangni'n semkhat kha semni kangar boolpi inlang ama rabing kha minsippi taru. 7 Apum takdiang inpe ama lurna khat-um hoina angnganumeisanu chungnga poongna khat-um raalna kha petaru.Ajarchu numeisanu khan amalungnga ati:‘Rengnu ka-eya kei'n hin ka-in-ong!Kei chuulmei emong,Kei kapoong tihi mununing!’ 8 Hiwa jarra, nisuokhat ah numeisanu kha riraithina, ruoithihuuina khat-um bukawaang amusik eii.Halli numeisanu kha mei'n akaangsik eii,ajarchu numeisanu chungnga chongkatan Pumi Pathian khachu akaraat kha eii.” 9 Numeisanu le zool-inthai khat-um amale kahoisuom nuoipilchung rengngai khan numeisanu kaangna meikhu inmu phakhan inmani ngai'n numeisanu chungnga inwai inta inchappuisik eii. 10 Inmani ngai'n numeisanu poongna kha inchi jarra kalaak-ah inngirli inchap-ah inleiti. “Angtuk chikaomme! Angtuk poongkaomme! Nang inthang khuopui Babylon! Phadan inkhat suungnga nang rachaakna namujei!” 11 Nuoipil chungnga Sialsum louwa phurkajuor ngai innum numeisanu chungnga inwaile inruoiya inchap, ajarchu tuteii innum inmani phur ngaikha rachomujei; 12 Tuteii innum inmani soonna, dangka, lungman katam, pearls, linen puon, purple puon, silk puon, puon kasen, thingman katam, saipui ha-ah inbool phurman katam, sumsen, thir, marble, 13 lailong, an maruoi, berou, myrrh, sariak rimhoi, theibomju, olive sariak, waipooldi khat-um gehu, saraat, keelngam, sakor ngai khat-um sakor kari ngai, suok sik-ah injuor mi ngaihi iteii rachopi mujei. 14 Phur juorra sial kalou inmani ngai'n numeisanu diang inti, “Nang neinaak nimin ezoot phur katha rakip ngaihi inmangjei, nang inhoipui neinaak rakip ngaihi inmangjei halli nang in hiwa ngaihi woikhat muritnutinjei!” 15 Khawa khuopuiya sial li sum louwa phur kajuor inchong ngaikhan numeisanu poongna khan inchelsik inleichi jarra kalaak-ah inngirra inwaiya inchaple inruoiya, 16 inti, “Angtuk chikaomme! Angtuk poongkaomme nang inthang khuopui! Nang in linen puon, purple puon khat-um puon kasen ngaikha na-inluk-ah soonna, lungman katam khat-um pearls ah na-insuun! 17 Halli phadan inkhat suungnga nang neinaak rakip ngaihi mangjei!”Rakuong rakip-ah alu ka-eii khat-um akachuong ngai, rakuong chuongnga kasi kahong ngai, tuipuiya sial li sum kalou ngai innum kalaak-ah in-girra, 18 numeisanu kaangna meikhu kha inmuli inleichappui: “Hiwa angnga khuopui inthang leilaak inkhat-um ommak!” 19 Inmani ngai'n inlu chungnga rahut inchaiya inwaile inruoiya inchap-ah inti, “Angtuk chikaomme! Angtuk poongkaomme khawa khuopui inthang kha! Rakuong kanei rakip ngai'n ama inchongna khan inmani ngai-um inchong in-eii! halli phadan inkhat suungnga ama'n inei rakip mangjei!” 20 Numeisanu pur jarra, roktaru, E marwaan! Pathian mi ngai, roktaru! Tirton ngaili Pathian chongkachoi ngai, roktaru! Ajarchu nangnidiang numeisanu in innaleitho ngai jarra Pathian in ama chungnga chongtanna aneijei. 21 Hiwa thengli akaraat marwaan tirton inkhat in inthang lungchakari angnga kalok lung inkhat aruut-ah tuipui suungnga ajuodeengluut ah ati, “Hi angnga khawa inthang khuopui Babylon kha-um deengjuonsik eii halli woikhat inlet-ah munuminjei. 22 Saraangdar rasa ngaili saraangdar ka-aat ngai rasa, theikhang li tampalooi katum ngai rasa nang diangnga inphut jetnunujei! Sial li sum kalou mi omnunujei; halli chakari takrasa kha-um woikhat inlet-ah neinunijei! 23 Meiser meiwar kha woikhat inlet-ah nangdiang munuminjei; moipa li moinu rasa ngai-um woikhat inlet-ah nangdiang makheiya jetnuminjei. Nang phurngai kajuor mi ngai khan manmasituolla inraming kasikhet inlei-eii, halli akadikmak nang mitmalet dooi-ai khan manmasituol miring rakip ngaikha maleisei natho!” 24 Pathian chongkachoi ngai khat-um Pathian mi ngai thisen, halli nuoipil chungnga inthat mi rakip ngai thisen kha khawa inthang khuopui khan aluong jarra Babylon hi iminmang eii.
In Other Versions
Revelation 18 in the BOHNTLTAL
Revelation 18 in the TBIAOTANT