Job 31 (TOMA)

1 «Gè tɔgi zeini gàazuʋɛ maga é mina gaazuɠulapɔ wɛlɛ wo anzalopo ʋa. 2 Ni naa laade, leeni ɠa nà la sɔlɔɔ faa maaɓɔunGALA Zɛbɛi-Pɛ-Maliɠii ya, nii é geezuʋɛ? 3 Tɔɔzei maanɔɠɔi la makɛni telebotala nuiti bɛ ɓaa,ta nimizai naati bɛ, niiti ti faa ɲɔi ɠɛɛzu? 4 GALA ge la sìɛ ʋelei ʋɛtɛsu nɛi ɓaa?É la kɔ̀ɠɔlo daa ɠilagilagi pɛ gaalusu ɓaa? 5 «Zɛɛi ɠa nɛi gè ɠɛa ziɛzu su?Kɔ̀ɠɔ zu ɠɛa vilɛzu ga gè li kakama vaa ɠɛɛzuʋɛ? 6 GALA ge kɔ̀ɠɔ telebo kilo ɠa,é ɠɛ nà-sɔledai ɠwɛɛ! 7 Ni kɔ̀ɠɔi zeɠeni pele ʋagɔi ma,ni zìi ʋilɛni nà-gaazuɠulapɔ vaiti polu,ni zèeiti kɔzɔʋɛ ga kɛɛwoti ɲɔi ta, 8 naazu nii gè fazasu, taɠili ge naa mi,niiti gè ti ziinni, taɠili ge naati tɔɔɠula. 9 Ni gè looni anzanu lɛga zu,gè li, gè ɗa maaʋɛɛnɛ seiɲɔɠɔi ná-pɛlɛlaʋɛ, 10 naazu ànzai boti ɠɛ nu ɠili bɛ,nuiti ti-yiimai ɠɛ su! 11 Mazɔlɔɔ maaɓoo vaa ɠana, ɲamaba vaa ɠana,nii tukpɔɠaaleʋe nuiti ta ɗa ma lukpɔi ɠaaleʋe. 12 Nà-faaɠaazagi a la ɠɛ ga abui, a la gàla, eyɛsu é kòloɠolo,é naa kpein koloɠolo, nii gè sɔlɔɔni. 13 «Nà-botiɠɛ zunui ta, ɓaa nà-botiɠɛ anzanui ta, a la ɓaazaɠana mà,gè ɓena gaaɠula ba, gè maalobo. 14 Ni naa laade, leeni ɠa nà kɛ, siɛgi zu GALA ge wuzeɠezu la ga é tùkpɔ?Gè la zooga gè ʋa gooɠaaʋote, ni a ɠɛna gè ʋoluvaawo ma. 15 Zɔi é kpɛ̀tɛai dèe ɠoozu, tɔun taade é ʋa ti ɓɛtɛ ɓalaa ɓaa?Ungo, ma GALAGI ɓɔɠɔi nɔ ɠa é gi kpein kpɛtɛni gi-lee ɠoozu. 16 «Yeelɛ ɠa gè ɠɛlɛni la maawɔin nui ná-kpɔba vaa ʋa,ɓaa gè poanzai yɛ ná-kitotalai zu? 17 Anɠɛ nɛi nà ɠila ka gè ɠɛni nà-daamianigi miizu,podoin la ta miini? 18 Tɔun é zo mà loungo ziɛgi zu ma,bɔɔlɔʋɛ zèa, eɠɛ ɠɛɛɠɛi.Siɛgi kpein su gè ɠɛni poanzai lɛnɛ nui. 19 Kaipa gè maawɔin nu ɠaa ʋɛ, gè zɛ seɠe ʋalagi zu,ta bala nui gè naa yɛ pɛɛmazeɠe ʋalagi zu? 20 Ɓa-o, tɔun ti ɠɛni tuya loozu bɛ̀,tɔɔzei gè ɠɛni seɠei veezu ti ya nii su ɓadiai, kpɛtɛai ga nà-baalagiti maaleɠai. 21 Ni nà ɠɛna podoun maaluani tukpɔɠaaleʋezuʋɛtɔɔzei gè kwɛɛ ga tukpɔɠaaleʋe nuiti ta ga nà-poluzeigiti, 22 kpàkigi ɠula pòluzaamaʋɛ ʋa,ta zèei ɠula zeeɓoɓolaʋɛ ʋa, é ɠaleɠale! 23 Mazɔlɔɔ nà luazu maanɔɠɔi ʋa, nii GALA ge teʋeni,maayikiʋɛ, gè la zooga gè ʋa lo tuɠɔ. 24 «Gè ɠitoni nɛi zanugi ʋa? Ɓaa gè ɠɛ ma: ‹Dɔ̀ɔɠuzuʋɛ ɠa!› 25 Gè la ɠɛni ɠoozunɛɛni nɔ zèaɠɔligiti mɔin vai zu,naavoloiti gè ti zɔlɔɔgai ga zèei. 26 Siɛgi zu gè foloi ʋɛtɛni da, é ɗa volo ná-keɠaaɓaai zu,ɓaa siɛgi zu gè alugi ɠaani la, é ɗa ziɛ geezuʋɛ ná-maayikii zu, 27 gè ɠakani zìimaʋɛ dɔɔɠuzu,gè ʋa yeeʋɛɛ la, ga gè nɔkɔ ti wu ɓaa? 28 Kaka faa ɠana, nii maanɛai é lukpɔ.Nà la ɠɛlɛ GALA ba, nii é geezuʋɛ. 29 «Yeelɛ ɠa gè ɠɛni ɠoozunɛɛzu la, ga gè sìli nui ɠaa dɔai maanɔɠɔi zu,kòozunɛ, tɔɔzei faaɓaagi zeelia ma, 30 nɛ̀i gè la vaani bu pɛ nɛ̀gi ʋa koto ɠɛ,ga gè ʋa foovo, gè ɠɛ GALA ma, é za. 31 Ɓɛ ɠa gè la kɔnɔkulani ga suai, é ʋa yiɠo?Niiti kpein gè ti laazuʋɛɛni, naati ta naama zeele wooi wo. 32 Wɛɛn la ɲiini etea,gè nà-pɛlɛi laalaoni siɛ wo nuiti bɛ. 33 Eɠɛʋelei nuɓusɛ mɔinmɔin ga ɗa kɛ la,gè nà-tɔ koloɠologi lɔɔɠuni nɛi ɓaa?Gè ɠɛlɛ ga gè mina nà-faaɠaaza golai ɠwɛɛ? 34 Kaipa gè la luani nui zɔiti ta-lukpɔɠaaleʋei ʋa.Ti ɠɛni zoosu ti ɲɛɛɠula sù, naa la ɠɛni màaluazu,naa la dàaɠuluni kaipa,ɓaa é ʋa pele ɓesa tùɠɔ ga gè mina ɠula. 35 «Ee, ni nu ɠɛni bɛ̀, nii é woilosu gòoi ma!Gòo ɠaaɓelagi ɠana!GALA Zɛbɛi-Pɛ-Maliɠii ná-gooɠaaʋotegi ve zèa.Nii é ga maalɔɔ vai sìli nui sɛʋɛai, 36 nà naa laazu ɠɔma, gè dɔ ùnba eɠɛ masa bɔɔlɔgi. 37 Nà ʋoluvaawo ma ga nà-kɛɛwotii ɠilagilagiti pɛ,gè li tɔun pɔ bɛ eɠɛ masa! 38 Ni nà-zooiti ti pèelalani,ni gè ta-wozawoliaiti gaawɔlɔni, 39 ni gè ti-ʋaalɔnɔgiti miini nɔ, gè la ti ɠeyani,ni gè naati nimizani, niiti ti ɠɛni ti botii ɠɛɛzu, 40 adaʋɛ moloi naa ná, nii é ga ɓeleegi, ɠaingiti ti ʋɔnɔ miná,ta moloi nii daa ga wɔɔlezegi, gui ɲɔi ʋɔnɔ naa ʋotogi zu!»Zɔɓe ná-kpɔɛiti kwɛsuʋɛ ɠa.

Job 31 (TOMA)

In Other Versions